Ama suwaqa kasunchu

¿YAQACHU pipas imaykitapas suwarusurqanki?... ¿Rabiakurqanki?... Manam pipas suwawananchiktaqa munanchikchu. Ichaqa, ¿imanasqataq runakunaqa suwakuyman chayanku? ¿Suwatañachu mamanku wachakurqa?...

23 kaq yachachikuypim yachamurqanchik lliw runa huchasapa kaspanchik pantaq runakuna kasqanchikta. Ichaqa manam pitapas suwatañachu mamanchikqa wachakuwarqanchik. Pipas suwakuymanqa chayan tukuy imayuq kananpaq qullqi kuyasqanraykum. Chaymi allin uywasqa kaspanpas suwaña rikurirun.

¿Pitaq qampaqqa punta kaq suwa kanman karqa?... Huk angelmi karqa. Paytaqa hanaq pachapi kaspanraqmi Jesusqa riqsirqaña. Ichaqa, ¿imaynatataq chay angelqa suwa rikurirurqa mana pantaqta angelkunata Dios unanchachkaptinqa?... Chay angelqa 8 kaq yachachikuypi rimamusqanchikman hinam mana paypa kaqta munapayayta qallaykurqa. ¿Imataq chay munapayasqanqa karqa?...

Chay angelqa Adanwan hinaspa Evawan yupaychasqa kaytam munarqa. Ichaqa Jehova Diosllatamá yupaychanaqa karqa. Chayraykum chay angelqa Adantawan Evata huchallirachispan suwaña rikurirurqa. Chay angelqa satanas diablom.

¿Imanasqataq pipas suwakuyman chayan?... Hukpa imantapas llumpayta munapayasqanraykum. Chayraykum allin ruwaq runakunapas suwakuyman chayanku. Hinaspam wakinqa wanakuyta manaña munankuchu. Chaynam karqa Jesuspa apostolnin Judas Iscariotewanpas.

Judasqa warmacha kasqanmantapacham Diospa kamachikuyninman hina uywasqa karqa. Chaymi taksanmantapacha yacharqa “amam suwakunkichu” niq Diospa kamachikuynintapas (Exodo 20:15). Judasqa wiñasqanman hinam Jesusta riqsiruspan qatiqnin rikurirurqa. Chaymantapas Jesuspa huk kaqnin apostolninmi karqa.

Jesusqa apostolninkunawan kuskam maymanpas riqku hinaspa imallatapas mikuqku. Chaypaqmi qullqichankuta cajachapi waqaychaqku. Chay qullqinkum Judaspa makinpi karqa. Ichaqa, ¿allintachu Judasqa chay qullqita waqaychaq?...

Manam, chay qullqinku hurqukuytam qallaykurqa. Paykunapa mana yachasqallantam hurqukuq, hinaspam qullqi kuyayta qallaykuspan aswan achkataña munaq. Yachaykusunyá chayrayku imakuna ruwarusqanmanta.

Huk kutipim Lazaropa panin Maria Jesuspa chakinman miski asnaq aceiteta talliykurqa. Judasñataqmi chayta qawaspan piñakurqa. ¿Imanasqa?... Chay aceiteta achka qullqiman rantikuptinku chay rantikusqanku qullqi suwakuyta munasqanraykum. Chaymi niq tukurqa rantikuspa wakchakunaman qunamanta (Juan 12:1-6).

Jesusñataqmi Judasta nirqa Mariapa ruwasqanmanta ama rimakachananpaq. Hinaptinmi Judasqa piñakuruspan riqsisqa sacerdotekunaman rirqa. Chay runakunaqa Jesusta chiqnispankum mana pipa rikusqallanta tutallanpi Jesusta hapiruyta munarqaku.

Judasñataqmi chayta yachaspan sacerdotekunata nirqa: ‘¿Haykatataq quwankichik qamkunaman Jesusta entregaykuptiy?’, nispa.

Sacerdotekunañataqmi nirqaku: ‘Kimsa chunka qullqitam qusqaykiku’, nispa (Mateo 26:14-16).

Judasqa chay qullqita chaskikuykuspanmi Jesusta rantikuchkanmanpas hina rikurirurqa. ¿Allinchu karqa Judaspa chayna ruwasqan?... Chaykuna ruwaymanmi chayan suwakuy yachaq runaqa. Chayna runaqa qullqitam Diosmantapas hinaspa runamasinmantapas astawan kuyan.

Ichapas nichkanki: “Ñuqaqa Diosllatam imamantapas astawanqa kuyasaq”, nispa. Chay nisqayki allin kaptinpas manam chaynata nisqanchikraykullachu Diosman sunquqa kasun. Judaspas chaynatachá nirqa apostolnin kananpaq Jesus akllaptinqa. Wakin suwakunapas chaynatachá qallariypiqa nirqaku. Paykunamantawan rimarisun.

Huk kaqninmi karqa Jesusmanta aswan punta watakunapiraq kawsakuq Acan sutiyuq runa. Paymi Diospa puchukachisqan llaqtapi rikururqa kuyayllapaq pachata hinaspa quritawan qullqitapas. Hinaspam Diospaq mana apaspan llumpayta kuyarusqanrayku suwakururqa (Josuey 6:19; 7:11, 20-22).

Kunanñataq Davidmanta rimasun. Payqa Diospa akllasqanmi karqa Israel llaqtapi kamachiq kananpaq. Paymi Betsabey sutiyuq kuyayllapaq warmita qaway-qawasqanrayku llumpayta paywan kayta munarurqa. Ichaqa Betsabeyqa Urias sutiyuq runapa warminmi karqa. ¿Imatam Davidqa ruwanman karqa warmita ama munapayananpaq?...

Qaway-qawananmantaqa huk lawmanchiki pasakunman karqa. Ichaqa manayá chaytachu ruwarqa. Aswanqa wasinman suwakuchkaq hina pusakuspanmi qusantapas huk runakunawan wañurachirqa. ¿Imanasqataq chaykunata ruwarqa?... Hukpa warminta llumpayta munapayasqanraykum (2 Samuel 11:2-27).

Jehova Diosqa wanakusqanraykum Davidtaqa pampachaykurqa. Ichaqa achka sasachakuykunapim Davidqa tarikurqa chaykuna ruwasqanrayku. Churin Absalonmi Davidta kamachiq kasqanmanta hurquruyta munaspan runakunata abrazaqraq hinaspa muchaykuqraq. Chayta ruwaspanmi ‘Israel runakunapa sunqunta suwarurqa’. Chaymi runakunaqa paytaña kamachiq kananpaq churayta munarqaku (2 Samuel 15:1-12).

¿Haykallapipas Acan, David hinaspa Absalon hina llumpayta imatapas munapayarqanki?... Chay munapayasqayki hukpa kachkaptin apakuyqa suwakuymi. ¿Yuyachkankichu satanaspa ima munapayasqanta?... Runakunapa yupaychasqan kaytam munarqa Jehova Diosta yupaychana kachkaptinpas. Chaymi Adantawan Evataqa paypa munasqanta ruwarachispan suwa rikurirurqa.

Imanchikpas kikinchikpa kaptinqa, kikinchikmi tanteakunchik ima ruwaytapas utaq piman quykuytapas. Warmamasikikunapa wasinpi pukllaspaykiqa, ¿allinchu kanman imantapas upallalla apakuyniki?... Manam, tayta-maman qusuptillaykim apakuwaqqa. Mana willakuspayki imatapas apakuspaykiqa suwakuchkankim.

¿Imanasqataq hukpa kaqta upallalla apakuyta munawaq?... Llumpayta munapayasqaykiraykum. Chay suwakusqaykita hukkuna mana rikuptinkupas, ¿pitaq rikumuchkanman?... Suwakuyta chiqniq Jehova Diosmi. Chaymi Diosta hinaspa runamasinchikta kuyaspanchikqa mana imatapas suwakusunchu.