Runakunaqa, ¿saqinmankuchu mana allin ruwasqankuta?

MAYNA sumaqchiki kanman llapa runakuna allin ruwaqkuna kaptinchikqa ¿aw?... Ichaqa manam chaynachu. ¿Imanasqataq mana munastinpas wakinpiqa imatapas mana allinta ruwanchik?... Huchasapa runakuna kasqanchikraykum. Chayna kaptinpas wakin runakunaqa llumpay chiqnikuqmi hinaspa runamasin wañuchiqmi kanku. ¿Atinmankuchu chay mana allin ruwasqankuta saqiyta?...

Qaway rumikunawan Estebanta chuqaq runakunapa qipanpi sayaq runata. Paypa sutinmi hebreo rimaypi Saulo hinaspa griego rimaypiñataq Pablo. Payqa anchatam kusikurqa Jesuspa qatiqnin Estebanta wañuchiptinku. Ichaqa, ¿imanasqataq chayna karqa?

Sauloqa fariseo religionniyuq runam karqa. Chay fariseo runakunaqa punta apaqninkumanmi llumpa-llumpayta hapipakuqku Diospa palabran makinkupi kachkaptinpas. Chayraykum Saulopas chayna runa karqa.

Estebanta autoridadkunaman pusaptinkuqa Jerusalenpim Saulopas kachkarqa. Chay juzgaq runakunaqa fariseo runakunam wakinqa karqaku. Chaypim Estebanmanta tukuy mana allinkunata rimarqaku. Estebanñataqmi mana manchakuspan Jehova Diosmantawan Jesusmanta paykunaman willarqa.

Chay rimasqanwanmi juezkunañataq anchata piñakurqaku. Paykunaqa Jesustamá chayna chiqnisqankurayku wañurachirqaku, ichaqa kaqmanta kawsarimuspanmi Jesusqa hanaq pachaman kutikurqa. Chay runakunaqa ruwasqankumanta mana wanakuspankum Jesuspa qatiqninkunata qatikachayta qallaykurqaku.

Chay juezkunaqa Estebanta hapiruspankum llaqtamanta hawaman hurquruspa rumiwan chaypi wañunankama tukururqaku. Kay dibujopi qawasqaykiman hinam Estebanta wañuchiptinku Sauloqa anchata kusikurqa.

¿Imanasqataq Sauloqa anchata kusikurqa?... Warma kasqanmantapacha fariseo kaspan yachachisqankuta allinpaq hapisqanraykum. Payqa punta apaqninkunatam imapipas qatipakuq (Hechos 7:54-60).

¿Chayllachu Saulopa ruwasqan karqa?... Manam. Jesuspa qatiqninkunata tukuruyta munaspanmi qaritapas warmitapas presochanankupaq wasinkumanta aysaspa hurqumuq. Chaymi achka iñiqkuna Jerusalenmanta ayqikurqaku, ichaqa mayman rispankupas hinallam Jesusmanta willakuqku (Hechos 8:1-4).

Chaywanmi astawanraq Sauloqa rabiawan wañuq. Hinaspanmi sacerdotekunapa jefen Caifas runawan rimaq rirqa. Chay runañataqmi kachaykurqa Damasco llaqtapi yachaq Jesuspa qatiqninkunata chaqnasqata Jerusalenman pusamunanpaq. Ichaqa chay ruway munasqantaqa manam qispichirqachu.

Chay llaqtaman risqanpim qunqaymanta hanaq pachamanta achki kanchaykuptin uyarirqa: “Saulo, Saulo, ¿imanasqataq qatikachawachkanki?”, niqta. ¡Jesusmá hanaq pachamanta rimapayachkarqa! Chay achkiwan Saulo ñawsayaruptinmi Damasco llaqtaman puriqmasinkuna pusarqaku.

Kimsa punchawmantañataqmi Jesusqa Damasco llaqtapi qatiqnin Ananiasman rikuriykurqa. Hinaspam nirqa Saulopa ñawinta hampinanpaq hinaspa paywan rimananpaq. Chaymi Ananiasqa Saulopa chayman rispan Jesusmanta willarqa, hinaptinmi Sauloqa Jesuspi iñisqanrayku qawarikururqa. Chaynapim Sauloqa Diospa runanña rikurirurqa (Hechos 9:1-22).

Chaynaqa, ¿imanasqataq Sauloqa mana allinkunata ruwarqa?... Pantaypi kasqanraykum. Payqa qatipakuq Diospa palabranta qipanchaq hinaspa kikillankupi hapipakuq runakunatam. Chaymi Jehova Diosmanta imam kaqta yacharuspan pantaypi kasqanta musyakururqa. Hinaspaqa, ¿imatataq ruwarqa?... Jehova Diostañam serviyta qallaykurqa.

¿Imataq Saulowan chaymanta karqa?... Jesuspa apostolnintaqmi rikurirurqa. Paytam riqsinchik apostol Pablowan, paymi bibliapi achka librokunata qillqarqa.

Kunanpas achka runakunam Saulo hina kachkanku. Ichaqa mana allin ruwasqankutam mana saqiyta atinkuchu. ¿Imanasqa?... Allin kaqta ruwanankupaq satanas tukuywan harkasqanraykum. Chayta yachaspanmi Jesusqa hanaq pachamanta Pablota nirqa: ‘Paykunamanmi kachachkayki ñawinkuta kichamunaykipaq, tutayaypi kasqankumanta achkiman kutirichimunaykipaq hinaspa satanaspa makinmanta Diosman kutirichimunaykipaq’, nispa (Hechos 26:17,18).

Satanas diablom runakunata tanqan mana allinkunata ruwanankupaq. ¿Sasachakunkichu allin kaqkunata ruwaypi?... Llapanchiktam satanasqa sasachawanchik. Ichaqa manam chayllachu, ¿imaraqtaq sasachawanchik?... Huchasapa kasqanchikpas sasachawanchikmi.

Chaykunaraykum allin kaqkunata ruwanapaq anchata sasachakunchik. Hinaptinqa, ¿imatataq ruwananchik?... Anchatam kallpanchakunanchik allin kaqkunata ruwanapaq. Chayna kallpanchakuptinchikqa Jesusmi yanapawasun.

Kay pachapi Jesus kaspanqa mana allin ruwasqankuta saqinankupaq kallpanchakuq runakunatam llakipayaq. Chay tiempopiqa karqam achka qarikunawan puñuq warmikuna, chay ruwasqankuqa hucham karqa. Chayna warmikunatam bibliaqa chuchumikawan sutichan.

Chayna warmim huk kutipi Jesusmanta uyariruspan fariseo runapa wasinpi Jesus kachkaptin rirqa. Hinaspanmi Jesuspa chakinman miski asnaq aceiteta talliykurqa, hinaspam wiqinkunawan chakin nuyuchisqantapas chukchankunawan chakichirqa. Chaymi Jesusqa wanakusqanta qawaspan huchanmanta pampachaykurqa. Chaypi kaq fariseo runañataqmi piñakurqa (Lucas 7:36-50).

¿Imatataq huk kutipi chayna fariseokunata Jesus nirqa?.... Nirqam: “Chuchumikakunaraqmi Diospa munaychakuyninmanqa qamkunapa ñawpaqnikichikta richkanku”, nispa (Mateo 21:31). Chaytaqa nirqa fariseokunamantapas chay warmikuna Jesuspi iñispa huchankumanta wanakusqankuraykum.

Chaynaqa, ima ruwasqanchikpas mana allin kasqanta bibliawan yachaspanchikqa manañam ruwananchikchu. Aswanqa yachachiwasqanchikkunatam kasukunanchik. Chaynapim Jehova Diosqa ñuqanchikwan anchata kusikuspan wiñay kawsayta quwasun.