¿Imatataq churi-wawakunaqa tayta-mamankumanta munanmanku?
ANCHA kusikunapaqmi qarimantawan warmimanta runakuna rikurisqanchikqa. Ñuqanchikqa mamanchikpa wiksanpi rikurisqanchikmantapacham wiñayta qallaykunchik. Chayraykuchá runakuna ninku wawachakunapa nacesqanqa llumpay admirakuypaq kasqanta.
Wiksapi wawa rikurisqanmantapacham, qaripas-warmipas tayta-mama kaytaña qallaykunku. Wawakuna uchuychallaraq kaspankuqa tayta-mamallankumantaraqmi imatapas munanku, ichaqa wiñasqankuman hinam wawakunataqa yanapananchik yuyayniyuq, yachayniyuq, sumaq kawsakuyniyuq hinaspa Diosta kuyaspa wiñanankupaq.
Churi-wawakuna allinta wiñanankupaqqa tayta-mamankum kuyananku. Ichaqa chay kuyasqankutaqa ruwasqankuwanmi qawachinanku. Huk rimaypiqa churi-wawankunapaqmi allin qatipakunapaq hina kananku. Chaymantapas, wawakunataqa taksachanmantapacham allinta wiñanankupaq yachachina, chaynata mana ruwasqaqa aswan sasachakuykunam kanman.
Warmakunata allinta uywanapaqqa bibliapim achka yanapakuykuna kachkan. Arí, bibliapa yachachikuyninkunaqa imamantapas ancha allinmi. Bibliawan warmakunata yachachiptinchikqa chay yachachikuykuna Diosmanta kasqantam yachanqaku, manam runakunapa kasqantachu.
Bibliaqa tayta-mamakunatam kallpanchan churi-wawankuta allinta yachachispa uywanankupaq. Ichaqa, warmankupa wiñasqankuman hinam tayta-mamakunaqa paykunawan rimariyta sasachakunku. Chaymi kay JESUSMANTA YACHASUN niq qillqaqa ruwasqa kachkan chay sasachakuykunata atipanapaq. Kay qillqaqa Diospa munasqanman hina churi-wawakunata uywanapaqmi allinta yanapanqa. Chaymantapas warmamasinkunawan hinaspa yachachiqninwan rimanankupaqmi yanapanqa.
Kay qillqapiqa kachkantaqmi tapukuykunamanta warmakuna rimarinankupaqpas. Chay tapukuykunaqa ancha allintam warmakunata yanapanqa. Tapukuykunapa qatiqnillanmanmi kimsa puntochakunata (...) tarinki, chay puntochakunaqa tapukuyman hina warmachakuna rimarinankupaqmi kachkan. Chaykunata ruwaspankuqa kusisqallañam astawan yachayta munanqaku, mana chayqa chayllam amirunqaku.
Kayna tapukuykuna kasqanqa yanapasunkim warmaykipa sunqunpi imam kasqanta yachanaykipaq. Yaqapaschá rimarisqanqa mana tapukuyman hinachu kanqa. Ichaqa chay tapukuypa qatiqnillanpim imam kasqanta nichkan, chaynapi warmata allinta yuyaymanachinanpaq.
Chaymantapas kay qillqaqa 230 masnin kuyayllapaq dibujoyuqkunam kachkan, kachkantaqmi yaqa llapallan dibujokunapa kasqanpi tapukuyninkunapas. Kaykunam warmakunata kallpanchan qawasqankuman hina hinaspa leesqankuman hina rimarinankupaq. Chaymi warmaykiwan kuska dibujokunataqa qawanayki. Kay yanapakuykunaqa ancha allinmi kachkan yachachisqaykita mana chaylla qunqarunanpaq.
Warmachayki leeyta yacharuptinqa, kallpanchay kay qillqata qampaq leepusunaykipaq hinaspa kikinpas leenanpaq. Chaynata ruwaptinqa astawanmi umanpi hinaspa sunqunpipas allin yachachikuykuna takyanqa. Churi-wawaykichikwan allinta kawsanaykichikpaqqa amayá saqinaykichikchu kay qillqa leeytaqa.
Kunan punchawkunaqa astawanraqmi warmakunapaqqa tukuy rikchaq sasachakuykuna kachkan. Chaykunam kanman huchapakuykuna, layqa ruwaykuna utaq huk rikchaq mana allin ruwaykunapas. Chaypaqmi kay qillqaqa yanapanqa chay sasachakuykunata atipanankupaq. Ichaqa tukuy yachayniyuq Jehova Diosman asuykunankupaqmi astawanqa yanapanqa. Chaytam pimantapas aswan allin yachachiq Jesuspas ruwarqa. Ñuqaykuqa anchatam munaniku Diospa munasqanman hina kawsakunaykichikpaq kay qillqa yanapasunaykichikta.