11 KAQ YACHACHIKUY
Yachachiwaqninchik hinaspa consuelawaqninchik takikuna
Dios yanapaptinmi Davidwan hukkunapas Dios yupaychaq takikunata ruranku. Salmos libropim 150 chay takikuna kachkan
BIBLIAPI hatun kaq libroqa Diosta yupaychanapaq takikunam, chaytaqa huñurqaku yaqapas waranqa watakunapim. Chay qellqaqkunaqa ancha iñiyniyoq kasqankutam sumaqllataña qellqasqankupi qawachirqaku. Qawachirqakutaqmi kusikusqankuta, ñakarisqankuta, agradecekusqankuta, wanakusqankuta, yupaychasqankutawan llakikusqankutapas. Llapankum Diosta kuyarqaku hinaspa yanapasqantam musyakurqaku. Qawasunyá Salmos libropa wakin yachachisqankunata.
Jehová Diosqa tukuyta kamachinanpaq derechoyoqmi, alabaspa yupaychanapaqmi. Bibliam nin: “Jehová Dios [. . .], qamllam kanki kay pachapa altonpi Kamachiqqa”, nispa (Salmo 83:18, NM). Achka salmokunam Jehová Diosta alaban: cielokunata, lucerokunata, Allpapi kawsaqkunatawan imayna unanchawasqanchikmantapas (Salmos 8, 19, 139, 148). Wakinñataq serviqninkunata waqaychaspan salvasqanmanta hatunchan (Salmos 18, 97, 138). Wakinñataqmi hatunchan ñakariqkunata yanapasqanmanta, hinaspa mana allin ruraqkunata castigasqanmantapas (Salmos 11, 68, 146).
Jehová Diosqa yanapakuytawan consuelotam qon kuyaqninkunaman. Nichwanmi salmo 23 aswan reqsisqa kasqanta, chaypim Davidqa Diosta rikchanachin ovejankunata kuyakuywan cuidaq michiqwan. Salmo 65:2 nisqanpas yuyarichiwanchikmi Jehová Dios ‘mañakusqanchikta uyarisqanta’. Huchallikuruqkunapas consuelotam tarinku Salmos 39 hinaspa 51 nisqanpi. Chaypim Davidqa qawachin huchallikusqanmanta wanakusqanta, segurotaqmi tarikun Dios pampachananmantapas. Salmo 55:22 nisqanpas kallpanchawanchikmi Diospi confiaspa yanapachikunapaqpas.
Mesiaspa Kamachikuyninwanmi Jehová Diosqa mosoq pachata apamunqa. Kay takikunapiqa achka kutipim riman Mesiasmanta otaq prometesqa Reymanta. Salmo 2 capitulopim willakun kay Reyqa contranpi kaq ima naciontapas chinkachinanmanta. Salmo 72 capitulopas qawachinmi yarqaytawan lliw mana allin ruraykunata chinkachinanmanta. Salmo 46:9 nisqanman hinapas Diosmi Jesucristopa Gobiernonwan tukuchinqa guerrakunatawan lliw armakunatapas. Salmo 37 capitulopipas leenchikmi mosoq pachapi mana allin runakuna chinkaptin, allin runakunallaña hawkayaypi wiñaypaq kawsakunankuta.