20 KAQ YACHACHIKUY
Cristopa wañukusqan
Jesusmi qallarichin yuyarinapaq kaqta; traicionanku hinaspam qerupi wañuchinku
JESUSQA 3 wata partenñam predicachkarqa, yacharqataqmi kay Pachapi pisi tiempollaña kananta. Religionpi punta apaq judiokunaqa wañuchiytam munarqaku, ichaqa runakunatam manchakurqaku profetapaq hapisqankurayku. Hinaptinmi Satanasqa Judas Iscariote apostolta intururqa Jesusta traicionananpaq. Chaypaqmi 30 qollqeta pagaykurqaku.
Chay tutam Jesusqa apostolninkunawan huñunakurqaku Pascua fiestata ruranankupaq. Judasta pasakunanpaq niruspanmi, Jesusqa qallarichirqa yuyarinapaq kaqta, chayqa Señorpa Santa Cenanmi karqa. Tantata hapiykuspanmi, Diosta mañakuspan 11 apostolninkunaman qoykurqa. Chaymantam nirqa: “Kaymi cuerpoy qamkunarayku entregasqa. Chaynatam qamkunapas rurankichik ñoqata yuyariwaspa”, nispa. Chaymantañataq, vinoyoq vasota haywaspan nirqa: “Kay vinoqa yawarniywan rurasqa mosoq contratom”, nispa (Lucas 22:19, 20).
Chay tutam Jesusqa apostolninkunaman tukuyta yachachirqa. Qorqataqmi huk mosoq kamachikuytapas: tukuy sonqomanta kuyanakunankupaq. Nirqam: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:34, 35). Nirqataqmi tukuy ima pasananmanta mana hukmanyarunankupaq, hinaspam paykunapaq anchata mañakurqa. Tukunankupaqñataqmi, Diospaq alabanzata takiruspanku Getsemani huertaman rirqaku.
Chaypim Jesusqa qonqorakuykuspan tukuy sonqowan Jehová Diosta mañakurqa. Hinaptinmi qonqayllamanta achka soldadokuna, kaspiyoq runakunawan sacerdotekunapas hapinankupaq chayaramurqaku. Jesusta reqsinankupaqmi Judas muchaykurqa. Jesusta hapiruptinkum apostolninkunaqa lluptikurqaku.
Jesusqa Judiokunapa cortenpim Diospa Churin kasqanta nirqa. Juezkunañataqmi chay nisqanmanta tumparqaku Diosta kamisqanta, kaywanqa wañuchisqam kanan karqa. Hinaptinmi Roma nacionniyoq kamachiq Poncio Pilatoman pusarurqaku. Payqa mana huchayoqpaqmi Jesusta hapirqa, chaywanpas runakunapa munasqantam rurarqa, paykunaqa qaparirqakum Jesusta wañuchinankupaq.
Golgota lawman Cristota aparuspankum, Roma soldadokuna qerupi clavarurqaku. Hinaptinmi, punchawqa qalaypaq tutayarurqa. Chay tarde Jesus wañukuptinmi hatun temblor karurqa. Payqa hatun rumipi toqosqa sepulturapim pampasqa karqa, qatiqnin punchawñataqmi sacerdotekuna sepulturapa punkunta taparuspanku cuidanankupaq kamachirqaku. ¿Chay sepulturallapichu Jesusqa kanman karqa? Manamá, aswanqa hatu-hatun milagrom pasanan karqa.
a Kaymantam astawan yachanki ¿Imatapunim Bibliaqa yachachin?, libropa 5 kaq yachachikuyninta.