¿Pikunam Diosta uyarirqaku llumpa-llumpay para tiempopi?

Noeypa tiemponpi runakunaqa llumpay mana allinllatañam ruwarqaku (Genesis 6:5).

Adanwan Evaqa wawa-churiyuqmi karqaku, chaymi chaylla kay pachapi runa mirarurqa. Chaymantam huk angelkunapas satanas hina Diospa contranpi hatarirurqaku.

Chay angelkunaqa hanaq pachamantam uraykamurqaku hinaspam warmikunawan casarakunankupaq runayarurqaku. Paykunapa churinkum mana allin ruwaqkuna karqaku, hinaspapas wakin runakunamanta aswan kallpasapam karqaku.

Kay pachaqa mana allin runakunawanmi huntarurqa. Bibliam nin “kay pachapi runakuna pasaypaq mana allinkunallataña ruwasqankuta chaynataq mana allin ruwayllapiña umayuq kasqankutapas”.

Jehova Diosta kasukuspanmi Noeyqa hatun buqueta ruwarqa (Genesis 6:13, 14, 18, 19, 22).

Noeyqa allin ruwaq runam karqa. Jehova Diosmi Noeyman willarqa mana allin runakunata llumpa-llumpay parawan chinkachinanmanta.

Nirqam maderamanta hatu-hatun cajaman rikchakuq buqueta ruwananpaq. Chaymanmi yaykuchinan karqa familianta hinaspa tukuy rikchaq animalkunata.

Runakunamanmi Noey willarqa llumpa-llumpay para kananmanta, ichaqa manam kasurqakuchu. Wakinqa asikurqakum, hukkunañataqmi llumpayta piñakurqaku.

Buqueta qispirachispanmi Noeyqa animalkunata chayman yaykuchirqa.