¿Imanasqataq Jehová Diospa testigonkunawan sutichakuniku?

Achka runakunam ninku Jehová Diospa testigonkunaqa mosoq religion kasqaykuta. Ichaqa 2.700 masnin wata ñawpaqtaraqmi Diosqa cheqap serviqninkunata suticharqa ‘testigoykuna’ nispa (Isaias 43:10-12). 1931 watakamam Biblia Estudiaqkunawan reqsichikurqaniku. ¿Imanasqataq Jehová Diospa testigonkunawanña sutichakurqaniku?

Diosniykuta reqsichisqanraykum. Diospa sutinmi Jehová, chay sutiqa achka waranqa kutitam Bibliapi rikurin ñawpa tiempopi qellqasqankuman hina. Ichaqa wakin Bibliakunapim tikrarunku Diospa sutinpa rantinpi Señor otaq Dios nispalla. Diosmi Moisesman willarqa sutinqa Jehová kasqanta. Nirqam: ‘Kaymi wiñaypaq sutiyqa’, nispan (Exodo 3:15, NM). Chay sutiwanmi reqsichikurqa cheqap Dios kasqanta. Kusikunikum paypa sutinman hina sutichakusqaykumanta.

Imam rurasqaykuta qawachisqanraykum. Abelmantapacham llampu sonqo runakunaqa Jehová Diospi iñisqankumanta willakurqaku. Tiempo pasasqanman hinam Noey, Abraham, Sara, Moises, David hinaspa hukkunapas ‘puyu hinaña testigokunaman’ yapakurqaku (Hebreos 11:4–12:1). Imaynam juezpa qayllanpi pipas inocente runapa favorninpi rimanman chaynam ñoqaykupas Diosmanta cheqapta willakuniku.

Jesusta qatipakusqaykuraykum. Bibliam Jesusmanta nin: “Cheqap kaq, cheqap niq, allin testigo kaq”, nispa (Apocalipsis 3:14). Kikinmi nirqa Diospa sutin reqsichisqanmanta chaynataq Diosmanta ‘cheqapta rimasqanmantapas’ (Juan 17:26; 18:37, NM). Chaymi cheqap cristianokunaqa Diospa sutinman hina reqsichikunanku hinaspa paymanta willakunanku. Chaypaqmi Jehová Diospa testigonkunaqa kallpanchakuniku.

• ¿Imanasqam Biblia estudiaqkunawan sutichakusqaykumanta Jehová Diospa testigonkunawanña sutichakurqaniku?

• ¿Haykapimantataq Jehová Diospa testigonkuna Allpa pachapi karqa?

• ¿Pitaq ancha reqsisqa Testigo karqa?