¿Imaynatam yanapaniku sasachakuypi kaq iñiqmasiykuta?

Ima desgraciapas pasaptinqa chayllam Jehová Diospa testigonkunaqa sasachakuypi kaq iñiqmasiykuta yanapaniku. Chayna yanapanakusqaykum qawachin kuyanakusqaykuta (Juan 13:34, 35; 1 Juan 3:17, 18). ¿Imakunapim yanapaniku?

Kapuqniykuwanmi yanapaniku. Judea llaqtapi muchuy kaptinmi Antioquia llaqtapi kaq cristianokuna iñiqmasinkuta yanapanankupaq qollqenkuta apachirqaku (Hechos 11:27-30). Chaynam kay tiempopipas iñiqmasiyku ima desgraciawanpas ñakarisqankumanta yacharuspaykuqa congregacionnintakama kapuqniykuwan chaylla yanapaniku (2 Corintios 8:13-15).

Ima ruraypipas yanapanikum. Ima desgraciapas pasaruptinqa ancianokunam sapakama iñiqmasiykuta maskanku ima peligromantapas libranankupaq. Ichapas wakin ancianokunaqa tanteanmanku aypunankupaq: mikuyta, yakuta, pachata hinaspa pikunata doctorman apanankupaq chaynataq maypi samachinankupaqpas. Imatapas allinta ruray yachaq Testigokunam desgracia pasasqan lawman viajanku, wasikunata hinaspa Salonkunata allichaypi yanapakunankupaq. Tukuy desgraciakuna pasasqanwanmi yacharuniku huk sonqolla llamkayta, chaymi ima desgraciapas pasaptinqa chaylla yanapanakuniku. Imamantapas ‘llalliriqtaqa iñiqmasiykutam’ yanapaniku, atikuptinqa yanapanikutaqmi mayqen religionpi kaqkunatapas (Galatas 6:10).

Diospa Palabranwanmi consuelaniku. Desgraciakunawan ñakariqkunaqa astawanmi necesitanku consuelaspa kallpanchaykunata. Chayna sasachakuykunapim Jehová Diosqa “sinchi kallpanchaqninchik” (2 Corintios 1:3, 4). Chaymi llakisqakunata Diospa promesankunawan consuelaniku, Bibliam qawachin Diospa Gobiernollan ima ñakariykunatapas chinkachinanmanta (Apocalipsis 21:4).

• ¿Imanasqam ima desgraciapas pasaptinqa chaylla yanapanakuniku?

• ¿Imaynatam desgraciapi kaqkunata Diospa Palabranwan consuelaniku?