10 KAQ YACHACHIKUY
¿Imaynatam reqsichwan cheqap religionta?
1. ¿Chullallachu kanman cheqap religionqa?
Cuidakuychik “Diosmantam willakuchkani” niq llullakunamanta. (MATEO 7:15.)
Jesuswan qatiqninkunaqa cheqap religionllapim Diosta yupaycharqaku, chaytam Jesusqa tupachirqa wiñay kawsayman apaq ñanwan, chay ñannintaqa wakillanmi richkanku (Mateo 7:14). Palabranpi yachachisqanman hina yupaychaqninkunallatam Diosqa chaskin, chayna yupaychaqkunam iñiyninkupiqa huk sonqolla kanku. Leey Juan 4:23, 24; 14:6; Efesios 4:4, 5.
Qaway “¿Lliw religionkunatachu Diosqa chaskin?” niq videota.
2. ¿Imatam Jesusqa nirqa cristiano tukuqkunamanta?
‘Ninkum: “Cheqaptam Diosta reqsiniku” nispa, rurasqankuwanmi ichaqa qawachinku mana chayna kasqanta.’ (TITO 1:16.)
Cristiano tukuqkuna cheqap cristianokunata pantay yachachikuykunawan pantachinanmantam Jesusqa nirqa, chayqa nisqanman hinam cumplikurqa. Achka runakunam cheqap religionpi kasqankuta ninku ichaqa runakunatam engañanku. Cheqap cristianokunaqa imayna kawsasqankuwanmi sutillata reqsichikunku. Leey Mateo 7:13-23.
3. ¿Imaynatam reqsichwan cheqap cristianokunata?
Kaykunapi reparaspam:
Bibliaqa Diospa Palabran kasqantam hapinku. Runakunapa yachisqanta kasukunankumantaqa Bibliapa yachachikuyninkunata kasukunankupaqmi kallpanchakunku (Mateo 15:7-9). Yachachisqankuman hinataqmi kawsankupas. Leey Juan 17:17; 2 Timoteo 3:16, 17.
Diospa sutin, Jehová kasqantam hatunchanku. Jesuspas chaynatam rurarqa Taytanpa sutinmanta willakuspan. Runakunaman willaspanmi yachachirqa mañakusqankupi Taytanpa sutinta chuyanchanankupaq (Mateo 6:9). ¿Mayqan religiontaq Diospa sutinmanta willakun yachasqayki otaq tiyasqayki lawpi? Leey 1 Cronicas 16:8; Salmo 105:1.
Diospa Gobiernonmantam willakunku. Jesusqa Diospa Gobiernonmanta allin noticiakunata willakunanpaqmi Allpa pachaman hamurqa, chay willakuyllam runakunapaq sumaq suyakuyqa. Chay noticiamantam willakurqa wañunan punchawkama (Lucas 4:43; 8:1; 23:42, 43). Jesusqa qatiqninkunamanpas kamachirqam chay Gobiernomanta willakunankupaq. Pipas Diospa Gobiernonmanta willasuptikiqa, ¿mayqan religionmanta kasqantataq niwaq? Leey Mateo 24:14.
Manam kay pachapi mana allin ruraykunawanqa chaqrukunkuchu. Jesuspa qatiqninkunaqa manam chaqrukunkuchu politicawan nitaq ima chaqwa ruraykunawanpas (Juan 17:16, NM; 18:36) Manataqmi runakunapa imayna kawsasqankutaqa otaq mana allin rurayninkutaqa qatipakunkuchu. Leey Santiago 4:4.
Kuyanakuyninkum sutilla qawakun. Diospa Palabranpi yachasqankuwanmi maymanta kaptinkupas runamasinkuta respetanku. Pantay religionpi kaqkunaqa guerrakunapim chaqrukunku, cheqap cristianokunañataqmi mana (Miqueas 4:1-3). Aswanmi kapuqninkutapas servichikuspa runamasinta kallpanchanankupaq tiempochakunku mana imallapaq yanapaspa. Leey Juan 13:34, 35; 1 Juan 4:20.
4. ¿Reqsiwaqñachu cheqap religionta?
¿Ima religiontaq Bibliapa yachachisqanman hina Diospa sutinta hatunchan hinaspa Gobiernonmanta willaspa runakunaman sumaq suyakuyta qon? ¿Pikunataq tukuy sonqonkuwan kuyanakusqankurayku guerrapiqa mana chaqrukunkuchu? ¿Imaniwaqtaq kay tapukuykunamanta? Leey 1 Juan 3:10-12.