2 YACHACHIKUY
Jehova Dios kusisqa kanantam Rebecaqa munarqa
Rebecawan qosan Isaacqa Jehova Diostam kuyarqaku. Kay yachachikuypim qawasunchik imayna reqsinakusqankumanta hinaspa Jehova Diosta Rebeca imayna kusichisqanmantapas.
Isaacpa tayta-mamanpa sutinqa Abraham hinaspa Saram. Jehova Diosta kuyaq warmiwan Isaac casarakunantam Abrahamqa munarqa. Ichaqa Jehova Diosta mana yupaychaq runakunawanmi Canaan allpapi yacharqaku. Chaymi serviqninta (ichapas Eliezerta) kamachirqa Haran llaqtaman rinanpaq. ¿Imanasqataq chay llaqtaman rinanpaq kamachirqa? Abrahampa ayllunmi Haran llaqtapi yacharqa, chaypim Eliezerqa Isaacpaq allin warmita taripunan karqa.
Rebecaqa anchatam llamkarqa camellokunaman yakuta qonanpaq
Eliezerqa karu-karutam rirqa Abrahampa wakin serviqninkunapiwan. Chunka camellokunapim aparqaku mikuyta hinaspa regalokunata. Ichaqa, ¿imaynatam Eliezerqa tarinman karqa Isaacpaq warmita? Payqa yacharqam yakuta horqonankupaq pozoman sipaskuna risqankuta. Chaymi Haran llaqtaman chayaruspanku pozoman rirqaku. Chaypim Jehova Diosta mañakurqa: “Ñoqam nisaq huk kaqnin sipasta: ‘Ama hina kaspaykiyá puyñuykita uraykachispa yakuykita tomaykachiway’ nispa, hinaptinyá payñataq niwachun: ‘Tomaykuyá, tomaykachisaqtaqyá camelloykikunamanpas’”, nispa.
Hinaptinmi Rebeca pozoman chayaramurqa. Bibliam nin kuyayllapaq sipas kasqanta. Eliezermi yakuta mañakurqa, hinaptinmi payñataq nirqa: “Tomaykuyá taytáy. Camelloykikunapaqwanyá yakuta horqoramusaq saksanankukama”, nispa. Achka yakuta camellokuna tomasqanraykum Rebecaqa achka-achka yakuta pozomanta horqorqa. ¡Kuti-kutirispam yakutaqa astarqa! Qaway dibujota. ¿Imatam Rebeca ruwachkan? . . . Ancha llamkasqanta qawaspanmi Eliezerqa admirakurqa. ¡Jehova Diosmá mañakusqanta uyariykurqa!
Eliezerqa sumaq regalokunatam Rebecaman qorqa, payñataqmi Eliezerta hinaspa paywan hamuq sirvientekunatapas wasinman rinankupaq nirqa. Eliezermi Rebecapa familianman nirqa imanasqa Haran llaqtaman Abraham kachamusqanmanta. Nirqataqmi Jehova Dios mañakusqanta imayna uyariykusqanmantapas. Chayta uyarispam Rebecapa familianqa kusikurqa, hinaspam Eliezerta nirqaku: “Allinmi, Isaacwanyá casarakuchun”, nispa.
Rebecaqa Eliezerwanmi Canaan lawman rirqa Isaacwan casarakunanpaq
¿Munarqachu Rebecaqa Isaacwan casarakuyta? . . . Familian tapuptinmi arí nirqa. ¿Imanasqa? Payqa yacharqam Eliezerta Jehova Dios kachamusqanmanta. Chaymi Canaan lawman rirqaku, chayaruptinkum Isaacwan casarakurqa.
Rebecaqa Jehova Diostam kasukurqa, chaymi payqa waqaycharqa. Manam chayllachu: Rebecapa mirayninmantam Jesus rikurimurqa. Jehova Diosqa qamtapas waqaychasunkim Rebeca hina kasukuptikiqa. Chaymantapas, qanwanmi kusisqa kanqa.