5 KAQ YACHACHIKUY
Imaynatam aylluykiwan hawkalla kawsakuwaq
“Mosoq pachawan pachakuchkaq hinayá allinkunata ruraspa reqsichikuychik [. . .], sumaq sonqo kaspa, humillakuspa, llampu sonqo kaspa hinaspa pacienciakuspa” (Colosenses 3:12).
Casarakusqaykichik punchawmantam huk mosoq familiaña kankichik. Tayta-mamaykita hinalla kuyaspaykipas chaynataq respetaspaykipas, kunanqa señoraykitam otaq qosaykitam puntapi churanayki. Wakin familiayki mana chaynata qawaptinpas, Bibliapa nisqanta kasukusqaykim yanapasunki paykunawan hawkalla kanaykipaq hinaspa casado vidaykipi allin kanaykipaqpas.
1 AMA FAMILIAYKITAQA QONQARUYCHU
BIBLIAM NIN: “Tayta-mamaykita respetay” (Efesios 6:2). Hayka watayoqña kaspaykipas tayta-mamaykitaqa respetanaykim. Ichaqa señoraykipas otaq qosaykipas tayta-mamanpaqqa tiempochakunanmi. Chaywanqa manam hukmanyanaykichu, Bibliapa nisqanman hinaqa kuyakuyqa “manam envidiosochu” (1 Corintios 13:4; Galatas 5:26).
¿IMATAM RUWAWAQ?
Ama kaynakunataqa niychu: “Familiaykiqa manam entiendewanchu” otaq “Mamaykiqa manam ima ruwasqaytapas allinpaqchu qawan”, nispaqa
Señoraykipa otaq qosaykipa imayna tarikusqanpi piensay
2 RIMANA KAPTINQA RIMANAYKIM
BIBLIAM NIN: “Chayraykum qariqa Tayta-mamanta saqespa hukllawakunqa warminmanña chaymi iskayninku huk runa hinallaña kanqaku” (Genesis 2:24). Casarakusqayki qepamanqa yaqapaschá tayta-mamaykiqa hinalla qanmanta nanachikuyta munanqa chaynataq casado vidaykimantapas.
Ichaqa kuyakuywanmi ninaykichik imakunapi mana chaqrukunankupaq (Proverbios 15:1). Iskaynikichikpa familiaykichikwan kusisqa kawsanaykichikpaqqa yanapasunkim humillakuspa, llampu sonqolla hinaspa pacienciakuq kayniki. Yanapasunkitaqmi kuyakuywan aguantanakusqaykichikpas (Efesios 4:2).
¿IMATAM RUWAWAQ?
Casado vidaykipi familiaykichik llumpayta chaqrukusqanta qawaspaykiqa hawkalla tarikusqaykichikpi chaymanta rimaychik
Chaykuna pasakuptin imata ruwanaykichikpaq tanteaychik