“Huchaykikunaqa pampachasqañam”

Jesuswanqa achka runakunam tupayta munaqku, chaymi karukunamantaraq riqku yachachisqanta uyariq hinaspa imapas ruwasqanta qawaq. Chaymantam Jesusqa Capernaum llaqtaman kaqmanta kutirqa, hinaspam Diospa munayninta ruwaspan unay karqa. Hinaptinmi chaymanpas runakunaqa yacharuspanku samasqan wasipi chaylla huñunakururqaku. Chaypiqa karqakutaqmi lliw Galileamanta fariseokunawan Moisespa chaskisqan kamachikuymanta yachachiqkunapas, wakinqa Jerusalenmanta hinaspa Judeamantam rirqaku.

Achkallaña runa kasqanraykum wasipas huntarurqa punkunpas manaña yaykuy atinakama. Jesusñataqmi runakunaman yachachiyta qallaykurqa (Marcos 2:2). Chaymantam suchu runata hampirqa. Chayta ruwasqanwanmi qawachirqa ima ñakariytapas chinkachinanpaq hinaspa pitapas hampinanpaq atiyniyuq kasqanta.

Tawa runakunam chay suchu runataqa chakanapi wantuspa Jesusman aparqaku. Ichaqa huntallaña wasi kasqanraykum mana yaykuchiyta atirqakuchu (Marcos 2:4). Chaymi wasi hawanmanña siqaruspanku tejanta hurqurqaku, hinaspam chaynintaña uchkuruspa uraykachirqaku.

¿Jesusqa piñakurqachu chayta ruwaptinku? Manam, aswanqa hampinanmanta mana iskayrayasqankuta qawaspanmi suchu runata nirqa: “Huchaykikunaqa pampachasqañam”, nispa (Mateo 9:2). Jesusqa, ¿atinmanchu hucha pampachayta? Escribakunapaqwan fariseokunapaqqa manam. Chaymi sunqunkupi ninakurqaku: “¿Imanasqataq kay runaqa chaynata rimachkan? Diostam kamichkan. Diosllamiki hucha pampachaytaqa atinman”, nispanku (Marcos 2:7).

Jesusñataqmi rimapakusqankuta musyaspan nirqa: “¿Imanasqataq sunquykichikpi chaynata nichkankichik? ¿Mayqintaq aswan allin kanman, suchuta ‘huchaykikunam pampachasqaña’ niychu, icha ‘hatarispa chakanaykita aparikuspa puriy’ niychu?”, nispa (Marcos 2:8, 9). Jesusqa runakuna huchankumanta pampachasqa kanankupaq wañukunanta yachaspanmi, chay suchu runapa huchantaqa pampachachkarqaña.

Hinaspanmi Jesusqa lliw runakunapa huchanta pampachananpaq atiyniyuq kasqanta qawachispan suchu runata nirqa: “Hatarispaykiyá chakanaykita huqarispa wasikiman ripukuy”, nispa. Hinaptinmi suchu runaqa chaylla hatarirurqa, hinaspam chakananta hapispan llapanku qawachkaptin lluqsirqa. Runakunañataqmi kusikuymanta mana imanakuytapas atispanku Diosta hatuncharqaku, hinaspam nirqaku: “Manam haykapipas kaynataqa rikurqanchikchu”, nispanku (Marcos 2:11, 12).

Jesusqa suchu runata ima nisqanwanmi qawachirqa huchasapa kasqanchikrayku unqusqanchikta, chaynataq huchanchikmanta pampachasqa kaspaqa sanoña kawsakusqanchikta. Bibliapa willakusqanman hinaqa Adan huchallikuruptinmi ñuqanchikpas paypa huchanpi huchasapallaña kanchik, chaymi unqunchik hinaspa wañunchik. Diospa munaynin kay pachapi ruwakuptinqa Jesusmi Jehova Diosta yupaychaqkunapa huchanta pampachanqa. Chaynapim manaña ima unquykunapas kanqachu (Romanos 5:12, 18, 19).