“Manam haykapipas pay hinaqa pipas rimarqachu”

Jesusqa hinallam Jerusalenpiqa ramada fiestapi karqa, kusisqallañam kachkarqa achka runakuna paymanta mana iskayrayasqankurayku. Religionkunapi punta apaqkunam ichaqa piñakuspanku guardiakunata kacharqaku Jesusta hapimunankupaq (Juan 7:31, 32). Chaywanpas Jesusqa manam pakakurqachu.

Aswanqa runakunapa qayllanpi yachachispam nirqa: “Kachamuwaqniyman manaraq richkaspaymi qamkunawanraq kasaq, ichaqa pisi tiempollañam. Maskawankichikmi ichaqa manam tariwankichikchu, maymi kasqaymanqa manam qamkunaqa hamuyta atiwaqchikchu”, nispa (Juan 7:33, 34). Judiokunañataqmi ima niy munasqanta mana yachaspa ninakurqaku: “¿Maymantaq kayqa riyta piensachkan ñuqanchik mana tarinanchikpaqqa? ¿Icha griegokunapa kasqanpi chiqisqa judiokunamanchu riyta piensachkan griegokunata yachachinanpaq? ¿Ima niytataq munachkan, ‘maskawankichikmi ichaqa manam tariwankichikchu, maymi kasqaymanpas qamkunaqa manam hamuwaqchikchu’ nispanqa?”, nispa (Juan 7:35, 36). Jesusqa wañukuspa kawsariramuspan hanaq pachaman kutikunanmantam rimachkarqa, chaymanqa manam chiqniqninkunaqa rinankuchu karqa.

Chaymantam fiestapa qanchis kaq punchawninpi huk sacerdote Siloam pozomanta yakuta hurqurqa, hinaspam chay punchawkuna altarpa sikinman sapa madrugaw yakuta talliq. Chaytachusmi runakunaqa yuyarirqaku kallpawan Jesuspa kayna nisqanwan, nirqam: “Pipas yakunayachikuqqa ñuqaman hamuspanyá tomachun. Ñuqapi iñiq runamantaqa Diospa qillqanpa nisqanman hinam, ‘ukunmanta kawsay qukuq yaku mayu hinaraq tuqyamunqa’”, nispa (Juan 7:37, 38).

Jesusqa rimachkarqam wañukusqan qipaman qatiqninkuna chuya espirituta hanaq pachaman rinankupaq chaskinankumanta. Chaymanta hamuq watatam qatiqninkunaqa pentecostes fiestapi chuya espirituta chaskispanku runakunaman Diosmanta willakunanku karqa, chayqa ‘kawsay qukuq yaku mayu hinaraq tuqyachkanmanpas hinam’.

Jesusta uyarispam wakin runakunaqa ninakuqku: “Hamunanmi karqa Diosmanta willakuq runa, payqa chiqaptapunim chay willakuq runa”, nispa. Chaynataqa niqku Moisesmantapas aswan allin runa hamunanmanta yachaspankum. Wakinñataqmi niqku: “Payqa Cristom”, nispa. Hukkunañataqmi niqku: “Cristoqa manamá Galileamantachu hamunan karqa, ¿aw? ¿Manachu Diospa qillqanqa nichkan Davidpa mirayninmanta hinaspa Davidpa yachanan Belen llaqtachamanta Cristo hamunanta?”, nispa (Juan 7:40-42).

Runakunaqa tukuytam Jesusmantaqa rimaqku, wakinkuqa presocharuyta munaspankupas manam atiqkuchu. Chaymi riqsisqa sacerdotekunawan fariseokunaqa guardiakuna Jesusta mana pusaptinku nirqaku: “Imanasqataq mana pusamurqankichikchu”, nispa. Guardiakunañataqmi nirqaku: “Manam haykapipas pay hinaqa pipas rimarqachu”, nispa. Sacerdotekunawan fariseokunañataqmi piñakuspa pinqaypi churanankupaq nirqaku: “Manachá qamkunapas engañarachikamunkichikchu, ¿aw? Manachá kamachikuqkunamanta nitaq fariseokunamantaqa chullallapas paypiqa iñirunchu, ¿aw? Moisespa leynin mana riqsiq kay runakunam ichaqa ñakasqa kanku”, nispa (Juan 7:45-49).

Chaymantam Nicodemo sutiyuq fariseo runa rimarirqa, payqa tukuy rikchaq autoridadkunamanta huk kaqninmi karqa. Payqa yaqa iskay wata ñawpaqtam Jesusta tutallan watukurqa, hinaspam Jesusmanta mana iskayrayasqanta qawachirqa. Paymi Jesusmanta allinta rimaspan nirqa: “Chaskisqanchik Moisespa leyninman hinaqa manam pitapas juzgachwanchu kikinta manaraq uyarichkaspaqa nitaq ruwasqantapas manaraq yachachkaspaqa, ¿aw?”, nispa. Hinaptinmi paykuna nirqaku: “Qampas manam Galileamantachu kanki, ¿aw? Diospa qillqanta allinta estudiay hinaspayá cuentata qukuy Diosmanta willakuq Galileamanta mana hamunanta”, nispa (Juan 7:51, 52).

Chaywanpas Diosmanta willakuqkunaqa nirqakuñam Galileapi ‘hatun achki rikurinanmanta’, chayqa qawachirqam Diospa akllasqan runaqa chaymanta hamunanta (Isaias 9:1, 2; Mateo 4:13-17). Chaymantapas Jesusqa Belen llaqtachapim nacerqa, hinaspapas Davidpa mirayninmi karqa. Tukuy chaytaqa yaqachusmi fariseokunaqa yachaqku, chaywanpas runakunamanmi Jesusmanta pantaykunata yachachiqku.