5 KAQ

Kutiriychikyá ‘allin michiqnikichikman’

¿Yaqachu kay qillqapa qawachisqan huk kaqnin sasachakuypi tarikuchkanki? Chayna kaptinqa, manam qamllachu chaynapi tarikunki. Jehova Diospa achka serviqninkunapas chaynapim tarikurqaku. Paykuna hinam qampas atipayta atiwaq Jehova Diospa yanapakuyninta chaskispayki.

Jehova Diosqa payman kutinaykipaqmi yanapasunki

JEHOVA DIOSQA payman kutinaykipaqmi yanapasunki. Yanapasunkim llakikuynikita, pipas sientichisusqaykita atipanaykipaq hinaspa hawka sunqulla yupaychanaykipaqpas. Chaynapim kallpanchasqa tarikunki iñiqmasikikunawan kuska kaqmanta Jehova Diosta servinaykipaq. Yaqachá ñawpaq tiempopi Jesuspa qatiqninkuna hina tarikunki, paykunamanmi apostol Pedro nirqa: “Qamkunaqa karqankichik chullasqa ovejakuna hinam, kunanmi ichaqa Cristomanña kutirikunkichik. Paymi allin michiq hina almaykichikta michichkan”, nispa (1 Pedro 2:25).

Jehova Dioswan kaqmanta allin amistad kayqa ancha allinmi. ¿Imanasqa? Jehova Diosta anchata kusichisqanraykum (Proverbios 27:11). Diostaqa imapas ruwasqanchikwanmi kusichichwan utaq llakichichwan. Chaywanpas payqa manam hikutawanchikchu servinanchikpaqqa (Deuteronomio 30:19, 20). Bibliamanta rimaq huk runam nin: “Runapa sunquntaqa ukullamantam kichachwan, manam hawamanta kichaytaqa atichwanchu”, nispa. Jehova Diosta kuyasqanchikrayku servispanchikqa, sunqunchikta kichachkachwanpas hinam kanman. Chayqa anchatam kusichin, paypaqqa ancha chaninniyuqmi payman sunqu kayninchikqa. Manamá imapas kusichiwanchikmanchu Diosta yupaychayninchik hinaqa (Hechos 20:35; Apocalipsis 4:11).

Diospa llaqtanman kutiq huk iñiqmasinchiktam kuyakuywan hinaspa kusisqa chaskichkanku

Chaymantapas, Diosman kutimuspaykiqa paymanta yachachikuykunatam chaskinki (Mateo 5:3). Kaypi piensariy, achka runakunam tapukunku imapaq kawsasqanchikmanta hinaspam kay tapukuymantawan wakin tapukuykunapa kutichiyninta mana tarinkuchu. Jehova Diosqa paymanta yachanapaq munayniyuqtam unanchawarqanchik, Diosqa yachanmi payta yupaychaspalla kusisqa kawsananchikmanta. Chaymi Diosta yupaychayniki imamantapas ancha kusisqataqa tarichisunki (Salmo 63:1-5).

Jehova Diosqa munanmi llaqtanman kutimunaykita. Chay munaynintam qawachisuchkanki kay qillqata ruwachimuspan. Kay qillqataqa yachaywanmi ruwarqaku hinaspa Jehova Diosta mañakuspankum. Yaqachá huk kaqnin anciano utaq pi iñiqpas quykusurqanki chaynapi leenaykipaq. Yaqapaschá leesqaykiqa sunquykiman chayachkan. Tukuy kaykunawanmi Jehova Diosqa qawachisuchkanki mana qunqasusqaykita hinaspa kutimuptiki chaskiykuyta munasqantapas (Juan 6:44).

Jehova Diosqa manamá chinkasqa ovejankunataqa qunqarunchu. Chaytam Donna sutiyuq iñiqmasinchikpas musyakurqa, paymi nin: “Pisi-pisimantam Jehova Diosmanta karunchakururqani. Ichaqa sapa kutim bibliapa Salmo 139:23, 24 nisqanpi yuyaymanarqani, chaypim nin: ‘Diosnilláy, qawapaykuspayá sunqullayta riqsiykuy. Pruebaman churawaspaykiyá piensasqaykunata yachaykuy. Qawaykuyá mana allinta kawsaptiyqa. Wiñay kawsaypaq hinayá kawsachiway ñuqataqa’, nispa. Mana iñiq runakunawanqa manam haykapipas kusisqaqa tarikurqanichu. Yacharqanim Diospa llaqtallanpi kusisqa tarikunayta. Musyakururqanim Jehova Dios mana haykapipas saqiwasqanmanta, payman imayna kutinallaypaqmi maskanay karqa. ¡Anchatamá kutimusqaymantaqa kusikuni!”, nispa.

“Musyakururqanim Jehova Dios mana haykapipas saqiwasqanmanta, payman imayna kutinallaypaqmi maskanay karqa”

Diostamá mañakuniku kusikuyninpi takyanaykipaq (Nehemias 8:10). Manamá haykapipas ñakakunkichu Jehova Diosman kaqmanta kutispaykiqa.

Ichapas kaynata tapukuchkanki

¿IMATAM RUWANAY KUTINAYPAQ?

Pipas unquruspanqa punchawkuna risqanman hinam pisi-pisimanta kallpata hapispan imapas ruwayninkunata ruwan. Iñiynikipi kallpanchasqa tarikunaykipaqpas, pisi-pisimantam yanapakuykunata chaskinayki. Ichapas sapa punchaw pisillatapas Diosmanta yachawaq. Allinmi kanman pisi tiempollapi bibliata leeyniki utaq uyariynikipas. Estudiawaqtaqmi huk kaqnin qillqanchikkunata utaq internetpi jw.org nisqantapas qawawaqmi. Kallpanchakuwaqtaqmi huk kaqnin huñunakuyman rinaykipaq. Chaymantapas yanapasunaykipaqmi Diosta mañakunayki. Bibliam nin: ‘Tukuy afannikichiktaqa Diosmanyá quychik, paymi qamkunamanta nanachikuqqa’, nispa (1 Pedro 5:7).

Eevam nin: “Diosmanta karunchakuruspayqa pinqakurqanim payta mañakuytaqa. Ichaqa kallpanchakuspaymi ruwarqani, chaymanta qipallanmanmi huk anciano watukamuwarqa. Paymi qawachiwarqa Jehova Dios mana qunqaruwasqanta. Kallpanchawarqam bibliata sapa punchaw leenaypaq. Chaynatamá ruwarqani, hinaspam kallpanchasqa tarikurqani kaqmanta huñunakuykunaman rinaypaq. Tiempopa risqanman hinam kaqmanta Diosmanta willakuyta qallaykurqani. Anchatamá kusikuni Jehova Dios chaskiykuwasqanmanta”, nispa.

¿IMAYNATAYA QAWAWANQAKU?

Iñiqkunaqa kusisqam tarikunqaku kaqmanta rikususpayki. Manam pipas hukmantaqa qawasunkichu. Llapankum kuyasusqaykita qawachisunki hinaspapas tukuy atisqankutam ruwanqaku kallpanchasunaykipaq (Hebreos 10:24, 25).

Javiermi nin: “Pinqakurqanim huñunakuykunaman riyta. ‘Imaynataya qawawanqaku’ nispaymi hukmanyarqani. Ichaqa 30 wataña mana rikusqay yuyaq iñiqmasinchikmi niwarqa: ‘¡Chayqaya kutiramunki wawallay!’, nispan. Chayna nisqanmi sunquykamaraq chayarurqa. Wasiymanpas kutiruq hinam tarikurqani”, nispa.

Marcom nin: “Huñunakuyman rispaymi mana pipas rikuwananpaq qipa tiyanakunapi tiyarqani. Ichaqa warma kasqaymantapacha achka riqsiwaqniykunam musyakururqaku. Allinta chaskiwaspankum kuyakuywan abrazaykuwarqaku, chaywanmi anchata kusikurqani. Wasiymanpas kutiruq hinam tarikurqani”, nispa.

¿IMAYNATAYA ANCIANOKUNA QAWAWANQAKU?

Ancianokunaqa kuyakuywanmi chaskisunki. Kusikunqakutaqmi Jehova Diosta tukuy sunquykiwan kuyanaykipaq kallpanchakusqaykimanta (Apocalipsis 2:4). Sumaqta uyarisuspaykim llampu sunqullawan mana allin ruwasqaykikunata saqinaykipaq yanapasunki (Galatas 6:1; Proverbios 28:13). Ichapas tanteanqaku huk iñiqmasinchikwan kuska bibliata estudianaykichikpaq, servichikunmanmi Kusisqa kawsakunapaq utaq castellano rimaypi Acerquémonos a Jehová niq qillqakunata. Ancianokunaqa yanapasunkim hinalla ñawparinaykipaq (Isaias 32:1, 2).

Victormi nin: “Pusaq wataña iñiyniypi chiriyasqa kaspaypas, ancianokunaqa hinallam yanapawarqaku. Huk ancianom wasiyman hamuspan paywan kuska fotokusqaykuta qawachiwarqa. Hinaspam yuyarirqani chay tiempokunapi kusisqallaña Jehova Diosta servisqaymanta. Ancianokunaqa llakipayaywanmi iñiyniypi ñawparinaypaq yanapawarqaku”, nispa.

“Diosmi kallpata qusunki”

Jehova Diospaqyá kusikuywan takisun niq takinanchikpim sumaq takikuna kan, chay takikunam yanapasunki kaqmanta Diosman asuykunaykipaq. Piensariy 38 kaq takipi, sutinmi: “Diosmi kallpata qusunki”, nisqa. Hurqusqam kachkan 1 Pedro 5:10 nisqanmanta.

Jehova Diosninchikqa tukuy sunquykiwan

maskasqaykitam qawamullarqa.

Chayraykumaˊ payqa pusamusurqanki

tutayaypiraq kallachkaptiki.

Chaynapim qamqa munaynintaña

chaylla ruwayta qallaykurqanki.
Churintamaˊ Diosqa qamrayku qumurqa

chaynapi kusisqa kanaykipaq.

Churillanta kayman kachamuchkaspanqa,

¿imaynamaˊ saqisunkimanqa?

Payrayku ima ruwasqaykipas

Diospaqqa yuyayninpimaˊ kachkan.

(CORO)

Kuyasqan churinwanmi rantiykusurqanki.

Paypaqñam kallanki, paymaˊ uywasunki.

Manam saqisunkichu, kuyasqanmi kanki.

Kallpatam qusunki, yanapaykusunkim.

Kay takita hinaspa hukkunatapas imayna takisqankuta utaq imayna tocasqankuta uyariynaykipaq, kayta fotochkaq hina celularnikiwan yaykuy utaq jw.org nisqanmanpas.