Pusaq runallamanta mirasqanchik

Noey ayllunwan hinaspa animalkunawan hatu-hatun buqueman yaykuruptinkum Diosqa buquepa punkunta wichqarurqa. Hinaptinmi parapas qallakuykuspan kay allpa pachatapas taparurqaraq, buquepas huqarikururqam. Chaynapim mana allin runakunapas wañururqaku, Noeywan ayllunmi ichaqa mana wañurqakuchu. Chayna kasukusqankuwanqa, ¡maynatachá kusikurqaku!

40 punchaw hinaspa 40 tutam nisyu-nisyuta paramurqa, chaymantam paraqa usyarurqa. Yakupas as-asmantam chayraq chakiyta qallaykurqa, chaymi hatun buquepas urqupa puntanpi takyarurqa. Ichaqa yaku hinallaraq kasqanraykum Noeywan ayllunqa manaraq lluqsiyta atirqakuchu.

Chaymi huk wata masnin yaku chakinankama Noeyqa aylluntin buquepi hinalla karqaku. Chaymantañam Dios kamachiptin lluqsispanku manaña mana allin runakunataqa rikurqakuñachu. Chayraykum agradecekuspa kusisqa tarikuspanku Jehova Diospaq animalkunata kañapurqaku.

Jehova Diosqa kusikurqam chay kañapusqankuwan, hinaspam nirqa: “Manañam runakunataqa kayna parawanqa chinkachisaqñachu”, nispa. Chayta runakuna mana qunqanankupaqmi chirapata rikurirachirqa. Qamqa, ¿haykallapipas rikurqankichu chirapata?

Chaymantapas, Jehova Diosqa Noeytawan aylluntam kamachirqa churi-wawayuq kaspanku allpa pachaman huntanankupaq.