Lotpa warmin mana kasukusqanmanta

Lotqa tion Abrahanwanmi Canaan allpapi yacharqa. Paykunapam animalninku mirarurqa campopas manaña haypanankama, chaymi Abrahanqa tion kachkaspanpas Lotta nirqa: “Amaña kuskaqa yachasunchu, ama hina kaspaykiyá qamraq akllakuykuy mayman rinaykipaq, ñuqaqa maymanpas rillasaqmi”, nispa.

Chaymi Lotqa achka yakupa hinaspa pastokunapa kasqan kuyayllapaq lawta akllakuykurqa, chaymanmi ayllunpiwan ripukurqa. Chay akllakusqan lawqa Sodoma llaqtapa hichpallanpim karqa.

Sodoma llaqtapi hinaspa hichpan Gomorra llaqtapi runakunaqa llumpay huchapakuqllañam karqaku, chayraykum Diosqa iskaynin llaqtakunata chinkachinanpaq tantiarurqa. Ichaqa manam munarqachu Lotwan ayllun wañunankutaqa, chaymi iskay angelkunawan kaynata willachirqa: “¡Utqayman kay llaqtamanta lluqsikuychik! ¡Jehova Diosmi kay llaqtata chinkachinqa!”, nispa.

Lotqa manam chayllachu lluqsirqa, chayraykum angelkunaña warmintawan chaynataq iskay warmi churinkunata makimanta utqayman hurqururqaku. Hinaspam chay angelkuna nirqaku: “¡Kallpaychik! ¡Qipaykichikta ama qawarikuspa lluptikuychik, chaynapi mana wañurunaykichikpaq!”, nispa.

Zoar llaqtaman chayaruptinkum Jehova Diosqa Sodoma hinaspa Gomorra llaqtaman azufreyuq nina parata kachaykurqa, chaymi qalaypaq chinkarurqa. Lotpa warminñataqmi mana kasukuspan qipanta qawarisqanrayku kachi rumiña rikurirurqa. ¡Maynatachá Lotwan churinkunaqa llakikurqaku! Chaywanpas Jehova Diosta kasukusqankuraykum hawkalla karqaku.