Jacobwan Esau allinyanakusqankumanta

Jacobmi Haran llaqtapi casarakuspan achka churiyuq hinaspa apu runa rikurirurqa. Taytan Isaacta hina chaynataq abuelon ­Abrahanta hinam Jehova Diosqa Jacobtapas yanaparqa.

Watakunapa risqanman hinam Jehova Diosqa Jacobta nirqa: “Kutikuy taytaykipa kasqan llaqtaman”, nispa. Chaymi Jacobqa llapallan ayllunwan karu-karutaña richkarqaku, hinaptinmi huknin sirvienten willaykurqa: “Wawqiki Esaumi hamuchkan tawa pachak runakunawan”, nispa. Hinaptinmi Jacobqa mancharikuspan Jehova Diosta mañakurqa: “Wawqiy Esaumantayá libraykullaway. Chayaramuspachá wañurachiwanqaku”, nispa. Paqarinnintintam Jacobqa ovejakunata, cabrakunata, vacakunata, camellokunata hinaspa asnokunata sirvientenwan pusachirqa Esauman qunanpaq.

Chay tutam Jacobqa sapallan qiparuspan Diospa angelninta rikururqa, paywanmi achikyanankama pelearqa. Huknin piernan muqakuruptinpas manam angeltaqa kacharirqachu, chaymi angelqa nirqa: “Kachaykuway pasakunaypaq”, nispa. Jacobñataqmi nirqa: “Manam kacharisqaykichu bendeciwanaykikama”, nispa.

Angelñataqmi Jacobta bendeciykurqa, chaymi Jacobqa yachar­qa wawqin Esau mana imanananmanta.

Chay punchawmi Jacobqa karumantaraq rikururqa Esauta tawa pachak runakunawan hamuchkaqta. Sapallanmi puntaruspan Esauwan tuparurqa, hinaspam qanchis kutikama qunqurakuykurqa. Esauñataqmi Jacobman kallpaspan abrazaykurqa. Iskayninkum waqaspanku allinyanakurqaku. Jehova Diospaqqa, ¿allinchu karqa Jacobpa ruwasqan?

Chaymantam Esauqa wasinman kutikurqa, Jacobñataqmi maymi rinanman ­hinalla rirqa. Jacobpam 12 churinkuna karqa. Sutinkum karqa: Ruben, Simeon, Leviy, Juda, Dan, Neftaliy, Gad, Aser, Isacar, Zabulon, Josey hinaspa Benjamin. Watakuna pasaruptinmi Jehova Diosqa Joseywan llaqtanta librarqa. Chaymantam qatiqninpi astawan yachasun.