Chunka iskayniyuq watiqaqkunamanta

Israel runakunam Sinai urqumanta Paran chunniqninta rispanku Cades lawman chayarurqaku. Chaypim Jehova Diosqa Moisesta nirqa: “12 runakunata sapa ayllumanta akllaspa Canaan allpata pakanpalla qawamunankupaq kachay. Chay allpatam Israel runakunaman qusaq”, nispa. Chaymi Moisesqa akllasqan runakunata nirqa: “Qawamuychikyá imayna allpa kasqanta. Runakunapas chaynataq yachasqankupas imayna kasqanta”, nispa. Chay 12 watiqaqkunamanta hukninkum karqa Josuey hinaspa Caleb.

40 punchawmantam chay watiqaqkunaqa uvaskunata, granadakunata hinaspa higoskunata aparikuspa kutiramurqaku, hinaspam nirqaku: “Allin allpam kasqa, runakunam ichaqa kallpasapa hatun runakuna kasqa. Llaqtakunapa pirqanpas hatu-hatunmi kasqa”, nispa. Hinaptinmi Calebqa nirqa: “¡Atipasunmi! Yaykusunña”, nispa. Josueypas chaynatam nirqa. Josueywan Calebqa Jehova Diospim hapipakurqaku. Chay 10 riqmasinkunam ichaqa nirqaku: “Ama risunchu. Ñuqanchikmantaqa aswan kallpasapam kasqaku, ñuqanchikqa chilliku hinallam kanchik”, nispa.

Chaymi Israel runakunaqa hukmanyarurqaku, hinaspankum rimapakuyta qallaykuspa nirqaku: “Kutikusunchik Egiptoman, huktaña akllasun kutichiwananchikpaq. ¿Wañuchiwananchikpaqchu Canaanman risun?”, nispa. Josueywan Calebñataqmi nirqaku: “Jehova Diostayá kasukusunqa, paymi yanapawasun. Ama manchakuychikchu”, nispa. Chaywanpas Israel runakunaqa mana kasukuspankum Josueytawan Calebta wañuchiytaraq munarqaku.

Chaymi Jehova Diosqa Moisesta nirqa: “Israel runakunapaqqa tukuytam ruwarqani, chaywanpas manam uyariwankuchu. Chaymi wañunankukama 40 wata chunniqpi kanqaku. Churinkunallañam hinaspa Josueywan Calebllañam qunay allpapiqa kawsakunqaku”, nispa.