Jehova Diosta qipanchasqankumanta

Tiempopa risqanman hinataqmi Corey, Datan, Abiram hinaspa 250 runakunapas mana kasukurqakuchu. Chay mana kasukuqkunam Moisesta nirqaku: “¡Qamkunataqa ñam amiruykikuña! ¡Manañam qamlla pusawanaykikutaqa munanikuñachu! ¿Imaynanpitaq Aaronlla sacerdotekunapa kamachiqninqa? Ñuqaykuwanpas Jehova Diosqa kachkanmi, manam qamkunallawanchu”, nispa. Chaynata nispankum Jehova Diosta qipanchachkarqaku.

Moisesñataqmi paykunata nirqa: “Diospa carpanmanmi paqarin hamunkichik, apamunkichikmi sansa apanaykichikta utaq incienso quntichinaykichiktapas. Chaypim akllasqan runata Jehova Dios riqsichiwasun”, nispa.

Chay paqarinnintintam Coreywan 250 runakuna Diospa carpanman rirqaku, hinaspam sacerdotekuna hina inciensota kañayta qallaykurqaku. Hinaptinmi Jehova Diosqa Moisestawan Aaronta nirqa: “Asurikuychik paykunamanta”, nispa.

Datanwan Abiranmi ichaqa aylluntin Diospa carpanmanqa mana rirqakuchu. Paykunaqa carpankupa punkunpim sayarqaku. Paykunamantapas Jehova Diosmi Israel runankunata nirqa: “Paykunapa carpanmanta asurikuychik”, nispa. Asurikuruptinkum aylluntinta Datantawan Abiramta allpa kichakuykuspan millpururqa. Diospa carpanpiñataqmi Coreytawan 250 runakunata nina wichiykamuspan chinkarachirqa.

Chaymantam Moisesta Dios nirqa: “Sapa ayllupa kamachiqninmantayá tawnata mañay, hinaspa tawnankupi sutinkuta qillqay. Aaronpa sutintapas Leviy ayllupa tawnanpi qillqay, hinaspayá lliw tawnakunata carpayman apay. Chaypim akllasqay runapa tawnanpi wayta ikllinqa”, nispa.

Paqarinnintinmi Moisesqa lliw tawnakunata hurquruspan ayllupa kamachiqninkunaman qawachirqa, hinaptinmi Aaronpa tawnan waytaruspan almendraskunata rururusqaraq. Chaywanmi Jehova Dios qawachirqa sacerdotekunapa kamachiqnin kananpaq Aaronta akllasqanmanta.