Watiqaqkunata Rahab pakasqanmanta

Jerico llaqtaman chayaruspankum Josueypa kachasqan iskay watiqaqkunaqa Rahab sutiyuq warmipa wasinpi samapakurqaku. Chayta yacharuspanmi Jerico llaqtata kamachiqqa Rahabpa wasinman soldadonkunata kacharqa. Rahabñataqmi wasinpa hawanpi pakaruspan soldadokunata nirqa huklawpi maskamunankupaq. Pasakuptinkum watiqaqkunata Rahab nirqa: “Jehova Diosmi qamkunawan kachkan, chaymi yanapaykichik. Uyarirunim kay yachasqayku allpatapas qusunaykichikmanta. Ama hina kaspayá aylluytawan salvaykuwayku”, nispa.

Chaymi watiqaqkunaqa Rahabta nirqaku: “Ventanaykiman puka waskata wataptikiqa, wasikipi kaqkunam mana wañunqakuchu. Aylluykikunaqa allinllam kanqaku”, nispa.

Rahabqa watiqaqkunatam yanaparqa, ¿imaynata? Ventananmanmi waskata watarurqa chayninta lluqsinankupaq. Chay watiqaqkunaqa kimsa punchaw urqupi pakakusqankumantañam Josueyman kutirqaku. Chaymantam Israel runakunaqa Jordan mayuta chimparuspanku allichakurqaku Jerico llaqtaman puntata munaychakunankupaq. Chaypaqmi Jehova Diosqa kamachirqa Jerico llaqtata sapa punchaw huk kutita muyunankupaq. Suqta punchawpunim chaynata ruwarqaku. Qanchis punchawpiñataqmi qanchis kutikama muyurqaku. Sacerdotekuna cornetankuta tocaptinkuñataqmi Israel soldadokunaqa llapallan kallpankuwan qaparirqaku. Chaywanmi Jerico llaqtapa hatun pirqankuna tuñiykurqa, Rahabpa wasinñataqmi mana tuñirqachu murallanman tupaqpi kaspanpas. Rahabqa Jehova Diospi hapipakusqanraykum ayllunwan mana wañurqakuchu.