Wawayuq kananpaq Diosta Ana mañakusqanmanta

Israel nacionniyuq Elcana sutiyuq runapa warminkunam karqa Anawan Penina, ichaqa Anatam astawan kuyarqa. Anaqa mana wachakuqmi karqa, chaymi Peninaqa achka wawayuq kaspan Anata ñakarichiq. Sapa watam Elcanaqa ayllunta Silo llaqtaman pusaq Jehova Diospa carpanpi yupaychanankupaq. Huk punchawmi chaypi kachkaptinku Elcanaqa musyarurqa Ana llumpay llakisqa kasqanta, chaymi Anata nirqa: “Amaña waqaychu, ñuqaqa anchatam kuyayki”, nispa.

Chaymantam Anaqa Diosta mañakuq sapallan rirqa. Llumpayta waqaspanmi Diosta mañakurqa: “Qari wawata quykuwaptikiqa qampaqmi sapaqchapusqayki wañukunankama”, nispa.

Anapa waqasqantawan simillan kuyusqanta qawaspanmi, sacerdotekunapa kamachiqnin Eliyqa sinkapaq hapirqa. Anañataqmi nirqa: “Amayá hapillawaychu sinkapaqqa, ñuqaqa Jehova Diosmanmi tukuy llakiykunata willakuchkani”, nispa. Eliyñataqmi nirqa: “Jehova Diosyá mañakusqaykita qusunki”, nispa. Chaymi Anaqa sunqun hawkayaykuptin pasakurqa, hinaspam manapas huk watamanta qari wawata wachakururqa, sutinmi karqa Samuel. ¡Maynatachá Anaqa kusikurqa!

Anaqa manam qunqarqachu mañakuspan Diosman prometekusqanta, chaymi wawanta anukaruspallan Diospa carpanman aparqa. Chaypim Eliyta nirqa: “Diostam mañakurqani kay wawata quwananpaq, chaymi apamurqani wañukunankama Diosta yupaychananpaq”, nispa. Chaynapim Elcanawan Anaqa sapa wata Samuelman pachanta apaqku. Tiempopa risqanman hinataqmi Anaqa Diospa yanapakuyninwan kimsa qaritawan iskay warmitawanraq wachakurqa.