Sansonman Jehova Dios kallpata qusqanmanta

Israel runakuna taytacha-mamachakunataña kaqmanta yupaychaptinkum, Jehova Diosqa saqirqa Filistea runakuna ñakarichinankupaq. Ichaqa karqataqmi Jehova Diosman sunqu Manoa sutiyuq runa. Paypa warminmi mana wachakuq karqa, chaymi Jehova Diosqa angelninwan kaynata willachirqa: “Wiksayakuspaykim qari wawata wachakunki. Paymi Filistea runakunamanta Israel runakunata libranqa. Wawaykiqa Diospaq sapaqchasqam utaq nazareom kanqa”, nispa. Diospaq sapaqchasqakunaqa manam chukchankutapas rutukuqkuchu.

Manoapa churin naceruptinmi Sansonwan suticharqaku. Chay wawaqa wiñaruspanmi Jehova Diospa yanapakuyninwan llumpay kallpasapa karqa, chaymi makillanwan leontapas wañuchiq. Sapallantaqmi 30 Filistea runakunatapas wañurachirqa, chayraykum Filistea runakunaqa wañuchiyta munarqaku. Huk tutam Gaza sutiyuq llaqtapi puñuchkaptin enemigonkuna punkupi suyarqaku “achikyaramuptinñam wañurachisunchik” nispanku. Ichaqa chawpi tutata lluqsiruspanmi Sansonqa, llaqtapa punkunta hurquruspan Hebronpa hichpan law urquman aparurqa.

Chaymantam Filistea runakunaqa Sansonpa kuyasqan Dalila sutiyuq warmita nirqaku: “Imarayku Sanson kallpasapa kasqanmanta willaykuwaptikikuqa, achka qullqitam qusqaykiku”, nispa. Dalilaqa qullqiraykum “arí” niykurqa, chayraykum Sansonta tapupayarqa imanpi kallpan kasqanmanta. Sansonñataqmi mana willakurqachu, ichaqa huk kutipim ­hikutapayaptin kaynata willaykurqa: “Diospaq sapaqchasqa kasqayraykum chukchaytaqa mana pipas rutuwarqachu. Ruturuwaptinqa manañam kallpay kanmanñachu”, nispa.

Chayta yacharuspanmi Dalilaqa chaylla Filistea runakunaman willaykurqa. Chaymantam millqayninpi puñurachispan, huknin Filistea runawan Sansonpa chukchanta ruturachirqa. Hinaspam qaparirqa: “¡Sanson, Filistea runakunam hapisuchkankiña!”, nispa. Sansonñataqmi rikcharirurqa manaña kallpayuq. Chayraykum Filistea runakunaqa presocharurqaku, hinaspankum iskaynin ñawinta hurqururqaku.

Huk punchawmi Filistea runakuna taytachanku Dagonta yupaychanankupaq huñunakurqaku, chaypim kaynata qaparirqaku: “Kay taytachanchikmi Sansonta quykuwanchik. Asichiwananchikpaqyá Sansonta pusamuychik”, nispa. Chaymi pusachimuspanku wasita hapiq pilarkunapa chawpinpi sayaykachirqaku, hinaspam paymanta asikurqaku. Hinaptinmi Sansonqa qaparispan nirqa: “Jehova Diosnilláy, kunanllañayá kallpata quykuway”, nispa. Chukchanpas kaqmantam wiñarurqa, chaymi Sansonqa llapallan kallpanwan pilarkunata tanqaykuptin wasiqa tuñiykurqa, ñitiruptinmi chaypi kaq lliw Filistea runakuna wañururqaku. Sansonpas wañukurqam.