Israel runakunata kamachiq Saulmanta

Unay watam Israel runakunaqa juezkunapa yanapasqan karqaku. Chaywanpas wakin nacionkuna hina kamachiqniyuq kaytam munarqaku. Chaymi Diosmanta willakuq Samuelta nirqaku: “Kamachiqniyku kanantam munaniku”, nispa. Samuelpaqqa manam allinchu karqa chayna mañakusqankuqa, chaymi Jehova Diosman willakurqa. Diosñataqmi nirqa: “Paykunaqa ñuqatam qipanchawachkan, manam qamtachu. Niyyá kamachiqninku kananmanta, ichaqa paymanmi tukuy mañakusqanta qunanku kanqa”, nispa. Chaywanpas hinallam hikutakurqaku kamachiqninku kananpaq.

Hinaptinmi Jehova Diosqa Samuelman willarqa Saul kamachiq kananmanta. Chaymi Samuelqa Rama llaqtaman Saul hamuruptin kamachiq kananpaq akllarqa. Chayta runakuna yachanankupaqmi umanman aceiteta tallirqa.

Chaymantam Samuelqa Israel runakunata huñururqa kamachiqninku runata riqsichinanpaq. Saulmi ichaqa manchakusqanrayku pakakururqa. Hinaptinmi tariruspanku Saultaqa llapallan runakunaman riqsichirqaku. Saulqa hatunkaray kuyayllapaq rikchayniyuqmi karqa. Samuelmi nirqa: “¡Qawaychik, Saultam Jehova Dios akllarun!”, nispa. Runakunañataqmi qaparispa nirqaku: “¡Kawsachun kamachiwaqninchik!”, nispa.

Chayllaraq kamachiyta Saul qallaykuspanqa Jehova Diostawan Samueltam kasukurqa, ichaqa chaymantam hatuntukururqa. Huk kutipim Samuelqa Jehova Diospaq animalta kañapunan karqa, Saulñataqmi Samuelta mana suyaspan Diospaq animalta kañarurqa. Payqa manamá chaytaqa ruwananchu karqa. Chaymi Samuel nirqa: “Jehova Diostam mana kasukurqankichu”, nispa. Chaynata niptinpas Saulqa hinallam mana kasukurqachu.

Chaymantam Saulqa llapallan Amalec runakunata Samuelpa nisqanman hina wañuchinan karqa. Ichaqa mana kasukuspam Amalec runakunapa kamachiqnin Agagta mana wañuchirqachu. Chaymi Jehova Diosqa Samuelta nirqa: “Saulqa manañam kasuwanñachu”, nispa. Hinaptinmi Samuelqa llakisqallaña Saulta nirqa: “Mana kasukusqaykiraykum Diosqa huk kamachiqtaña akllanqa”, nispa. Pasakunanpaq Samuel muyuriykuptinmi Saulqa pachanpa patanmanta hapipakuruspan llikirurqa. Hinaptinmi Samuel nirqa: “Chaynatam Jehova Diospas kamachiq kasqaykita llikirunqa”, nispa. Chaywanqa nichkarqam hukkaqnin kasukuq runataña kamachiq kananpaq Dios akllananmanta.