Davidmantawan Goliatmanta

Jehova Diosmi Samuelta nirqa: “Jeseypa wasinman riy. Paypa churintam akllaruni Israel runakunata kamachiq kananpaq”, nispa. Chayaruspanmi Jeseypa piwi churinta qawaykuspan piensarqa payta Dios akllarusqanmanta. Ichaqa Samueltam Dios nirqa: “Runaqa hawallantam qawan, ñuqam ichaqa qawani sunqunta”, nispa.

Suqta churintawanraq Jesey pusaramuptinmi Samuel nirqa: “Jehova Diosqa manam mayqantapas akllanchu. ¿Kayllachu churikikuna?”, nispa. Jeseyñataqmi nirqa: “Kachkanraqmi sullka kaq, sutinmi David. Payqa ovejatam michichkan”, nispa. Davidta pusaramuptinkum Samuelta Dios nirqa: “¡Paytam akllaruni!”, nispa. Chaymi Samuelqa Davidpa umanman aceiteta tallispan qawachirqa payña kamachiq kananmanta.

Chaymantam Filistea runakuna Israel runakunawan peleayta munarqaku. Filistea runakunamantam karqa hatunkaray Goliat sutiyuq peleaq runa. Paymi sapa punchaw Israel runakunamanta asikuspan kaynata nirqa: “Kachamuwaychik huknin runaykichikta ñuqawan peleananpaq, sichum atiparuwaptinqa sirvientekichikmi kasaqku, ñuqa atiparuptiyñataqmi sirvienteyku kankichik”, nispa.

Davidmi wawqinkunaman mikuyta apasqanpi Goliatpa asikusqanta uyariruspan kaynata nirqa: “¡Ñuqam paywan peleasaq!”, nispa. Kamachiq Saulñataqmi nirqa: “Qamqa warmallaraqmi kanki”, nispa. Kaqmantam David nirqa: “Jehova Diosmi yanapawanqa”, nispa.

Saulmi peleananpaq kikinpa pachanwan pacharachirqa, ichaqa chay pacha paypaq hatunsu kaptinmi Davidqa hurqukururqa. Chaymantam wayquta pasaspan pichqa lluchka rumichakunata wayqanman hinaykurqa, hinaspam Goliatman asuykurqa. Goliatñataqmi asikuspan nirqa: “¡Yaw maqtacha! ¡Asuykamuwayá! Animalkunamanmi cuerpoykita qusaq”, nispa. Davidñataqmi mana manchakuspan nirqa: “Qanmi hamuwachkanki espadawan hinaspa lanzawan, ñuqañataqmi Jehova Diospa sutinpi hamuchkani. Qamqa manam ñuqaykuwanchu peleachkanki, aswanqa Jehova Dioswanmi. Llapallan kaypi kaqkunam yachanqaku Jehova Dioslla atiyniyuq kasqanta. Paymi qamkunata quykuwanku”, nispa.

Hinaspam Davidqa Jehova Diospa yanapakuyninwan Goliatta urkunpi warakarurqa, hinaptinmi wañururqa. Filistea runakunañataqmi mancharikuspa chaylla ayqikurqaku. Davidqa Jehova Diospim tukuy sunqunwan hapipakurqa. Qampas Jehova Diospiyá hapipakuy.