Jehova Diospa wasinta ruwasqankumanta

Salomon kamachiyta qallaykuptinmi Jehova Dios tapurqa: “¿Ima qunaytataq munanki?”, nispa. Chaymi Salomon nirqa: “Warmaraq kasqayraykum ima ruwaytapas manaraq anchatachu yachani. Ama hina kaspayá llaqtaykita allinta kamachinaypaq yachayta quykuway”, nispa. Diosñataqmi nirqa: “Yachaytaqa qusqaykim. Pimantapas aswan yachayniyuqmi kanki. Yanapasqaykitaqmi apu kanaykipaqpas. Kasukuspaykiqa unay watataqmi kawsakunkipas”, nispa.

Hinaptinmi Salomonqa Diospa wasinta qurikunawan, llipipipiq rumikunawan hinaspa allinnin qirukunawan ruwarqa. Chaypiqa allin llamkaq qarikunawan warmikunam yanapakuspanku qanchis watapi qispirachirqaku. Tukuruspankuñataqmi Jehova Diospaq altarpi animalkunata kañapurqaku, hinaptinmi Salomonqa qunqurakuykuspan Diosta nirqa: “Taytallayku Jehova, kay wasiki ruwasqayku taksalla kaptinpas chaskiykullawaykuyá”, nispa. Mañakuyta tukuruptillanmi Diosqa hanaq pachamanta ninata kachaykamuspan altarpa hawanpi animalkunata ruparachirqa. Chaywanmi qawachirqa ruwapusqankuwan kusikusqanta, chaymi Israel runakunapas anchata kusikurqaku.

Salomonqa ancha riqsisqataqmi rikurirurqa, chaymi achka runakuna Salomonman riqku sasachakuyninkuta allichanankupaq. Saba nacionmanta kamachiq warmipas sasa tapukuykunata ruwananpaqmi Salomonpata rirqa. Salomonpa ima nisqanta uyariykuspanmi chay warmiqa nirqa: “Willawasqankumantam iskayrayarqani. Ichaqa yachaynikiqa uyarisqaymantapas aswanraqmi kasqa. Kunanqa yachaniñam ancha yachayniyuq kasqaykita. Jehova Diosnikim yanapachkasunki”, nispa. Chay tiempopiqa kusisqam kawsakurqaku Israel runakunaqa, watakunapa risqanman hinam ichaqa manaña chaynachu karqa.