Israel nacion iskayman rakikusqanmanta

Jehova Diosta Salomon yupaychaptinqa Israel runakunam hawka karqaku. Ichaqa huklaw nacionniyuq achka warmikunawan Salomon casarakuruspanmi, taytacha-mamachataña paypas yupaychayta qallaykurqa. Chaymi Diosqa piñakuruspan Salomonta nirqa: “Kamachisqayki naciontam rakisaq, hinaspam serviqnikiman qusaq. Serviqnikim achkallaña Israel runakunata kamachinqa, churikiñataqmi aschallataña”, nispa.

Chayna kananmantam Jehova Diosqa paymanta willakuq Aiyawan Salomonpa serviqnin Jeroboanman willachirqa. Jeroboanmi Aiyawan ñanpi tuparurqa, hinaptinmi Aiyaqa capanta chunka iskayniyuqman llikiruspa nirqa: “Salomonpa kamachisqan naciontam Jehova Dios iskayman rakinqa. Hapiy chunkaman llikisqayta. Qanmi chunka ayllukunata kamachinki”, nispa. Chayta yacharuspanmi Salomonqa Jeroboanta wañuchiyta munarqa, chaymi Jeroboanqa Egiptoman ayqikurqa. Salomon wañukuptinñataqmi churin Reoboamña kamachiyta qallaykurqa. Jeroboanpas Israel nacionmanmi kutiramurqa.

Chaymantam Israel nacionpi punta apaqkuna Reoboamta kaynata nirqaku: “Sichum kay runakunata sumaqllata kamachiptikiqa kasusunkim”, nispa. Ichaqa wiñaymasin musukunam nirqaku: “Chay runakunataqa astawanraqyá llamkachiy”, nispa. Chay musukunata kasuspam Reoboamqa runakunata llumpayta ñakarichirqa, chaymi piñakuruspanku Jeroboantaña akllarurqaku 10 ayllukunata kamachinanpaq. 10 ayllukunatam suticharqaku Israelwan, iskay ayllutañataqmi Judawan. Chay iskay ayllullañam Reoboamtaqa kasukurqaku. Chaynapim 12 ayllukunaqa rakinakururqa.

Reoboanmi chay iskaynin aylluta Jerusalenmanta kamachirqa. 10 ayllukunata kamachiq Jeroboanñataqmi piensarqa runankuna manaña payta kasunankuta, chaymi Jerusalenman rispa Diosta yupaychanankuta manaña munarqachu. Hinaspanmi qurimanta iskay malta torokunata ruwaruspan nirqa: “Jerusalenqa karu-karuraqmi, aswan allinqa kayllapiña kay malta torokunata yupaychaymi”, nispa. Runakunañataqmi Jeroboanta kasuspa Jehova Diosta kaqmanta qunqarurqaku.