Viudapa wawan kawsarisqanmanta

Usya tiempopim Eliasta Dios nirqa: “Sarepta llaqtaman riy, chaypim viuda warmi mikuchisunki”, nispa. Chay llaqtapa punkunman chayaruspanmi yanta pallakuchkaq viudata rikururqa, hinaspam yakuta mañakurqa. Yakuta quykuptinmi tantatapas mañakurqa. Viudam ichaqa nirqa: “Manam tantayqa kapuwanchu, imatach quykiman. Putquy harinawan pisi aceitechallam kapuwachkan wawaywan mikuykunaykupaq”, nispa. Eliasñataqmi nirqa: “Jehova Diosmi niwarqa tantata ruwaykapuwaptikiqa paramunankama harinawan aceitekipas kapusunaykimanta”, nispa.

Chaymi viudaqa wasinman rispan Diosmanta willakuq Eliaspaq tantata ruwarapamurqa. Hinaptinmi Jehova Diospa nisqanman hina paramunankama harinanwan aceitenqa mana tukurqachu.

Chaymantam viudapa wawan llumpayta unquruspan wañukurqa, hinaptinmi llumpayta llakikullarqa. Chaymi Eliaspa yanapakuyninta mañakurqa. Eliasñataqmi viudapa marqayninmanta warmata chaskiykuspan altospi puñunanman aparurqa, hinaspam siriykachispa Diosta mañakuspan nirqa: “Jehova Dioslláy ama hina kaspa kay wawata kawsariykachiy”, nispa. Chay tiempokamaqa manaraqmi pipas kawsarirqachu, hinaspapas viudawan wawanqa manam Israel nacionmantachu karqaku.

Chayna kaptinpas viudapa wawanmi kawsarirurqa. Hinaptinmi Elias nirqa: “¡Kayqaya wawaykiqa kawsarirun!”, nispa. Viudañataqmi llumpayta kusikuspan Eliasta nirqa: “Kunanqa yachaniñam atiyniyuq Diospa runan kasqaykita. Diospa nisusqaykimantaqa manam iskayrayanichu. Paypa nisqanqa ruwakunmi”, nispa.