Naaman sutiyuq runamantawan sipaschamanta

Siria nacionniyuq soldadokunam Israel nacionpi yachaq sipaschata apakurqaku. Chay sipaschaqa Siria soldadokunapa kamachiqnin Naamanpa warmintam servirqa. Chaypi yachaqkunaqa manam Jehova Diostaqa yupaychaqkuchu, chay sipascham ichaqa Diosta yupaycharqa.

Lepra unquy aychanta tukuruptinmi Naamanqa llumpayta ñakarirqa. Sipaschañataqmi yanapayta munaspan paypa warminta nirqa: “Riqsinim Israel nacionpi Jehova Diosmanta willakuq Eliseota. Payqa qusaykitam sanoyarachinqa”, nispa.

Naamanqa tukuytam ruwarqa sanoyananpaq, chaymi sipaschapa nisqanta warmin willaykuptin Israel nacionpi yachaq Eliseoman rirqa. Naamanqa piensarqam Eliseo sumaqta chaskiykunanmanta, Eliseom ichaqa wasin ukullamanta sirvientenwan kaynata nichimurqa: “Jordan mayupiyá qanchis kutikama mayllakaramuy, hinaspaqa sanoyarunkim”, nispa.

Naamanqa piñakuruspam nirqa: “Ñuqaqa nirqani: ‘Lluqsiykamuspanchiki Diosninta mañakuykuspa sanoyarachiwanqa’, nispaymi. Ichaqa chay mayuman rinallaypaqmi niykuwan. Siriapi mayuykuqa aswan allinmi, ¿manachu chay mayukunaman riyman?”, nispa. Chaynata nispam piñasqallaña pasakurqa.

Naamanta sirvientenkunañataqmi allinta yuyaymanachispa nirqaku: “Sanoyarunaykipaqqa tukuytam ruwawaq ¿aw? Diosmanta willakuq Eliseopa nisusqaykiqa manam sasachu. Nichkaptillanqa mayllakaramuyá”, nispa. Chaymi Naamanqa paykunata kasuspan Jordan mayupi qanchis kutikama mayllakururqa, hinaspam mayumanta sanoña lluqsirurqa. Naamanqa llumpay kusisqallañam Eliseoman kutispan nirqa: “Kunanqa yachaniñam Jehova Dioslla atiyniyuq kasqanta”, nispa. Wasinman sanoña kutisqanwanqa, ¡maynatachá sipaschaqa kusikurqa!