Jehova Diospa angelninkunamanta

Siria nacionta kamachiq Ben-adadmi achka kutikama Israel runakunata ñakarichirqa, hinaspam Israel kamachiqtapas wañuchinanpaq maskarqa. Israelta kamachiqmi ichaqa ayqikurqa Diosmanta willakuq Eliseo willaptin. Chaymi Dotan llaqtapi Eliseo kasqanta yacharuspan Ben-adadqa soldadonkunawan maskachimurqa.

Chay soldadonkunam Eliseota presochanankupaq Dotan llaqtaman tuta chayarurqaku, hinaspam llaqtata chawpicharurqaku. Achikyaqman chayta rikuruspam Eliseopa yanapaqninqa mancharisqallaña qaparispan nirqa: “Eliseo, ¿imapitaq rikukunchik?”, nispa. Payñataqmi nirqa: “Ama llakikuychu, ñuqanchikwan kaqkunam aswan achkaqa kachkan paykunawan kaqkunamantaqa”, nispa. Chaynata niruptillanmi Jehova Diosqa Eliseopa yanapaqninpa ñawinta kichaykurqa, hinaptinmi muyuriqnin urqukunapa hawanpi achkallay-achka caballokunatawan linwachkaq carretakunata rikururqa.

Siria soldadokuna presochanankupaq asuykamuptinmi Eliseoqa Diosta mañakurqa chay soldadokuna ñawsayarunankupaq, chaynapim soldadokunaqa maypi kasqankutapas mana musyakurqakuchu. Eliseoñataqmi paykunata nirqa: “Kay llaqtamanqa pantaramunkichikmi, ñuqam pusasqaykichik chay maskasqaykichik runaman”, nispa. Hinaspam Samaria llaqtaman pusarurqa, chaypim yacharqa Israelta kamachiq.

Siria soldadokunaqa chayraqmi musyakururqaku Israelta kamachiqpa makinpi kasqankuta. Israelta kamachiqñataqmi Eliseota tapurqa: “¿Kay runakunata wañurachisaqchu?”, nispa. Eliseoñataqmi enemigonkuna kachkaptinpas kamachiqta nirqa: “Ama wañuchispalla mikuykachispa kachaykuy”, nispa. Chaymi kamachiqqa saksayta mikurachispan kutikunankupaq kachaykurqa.