Jonasta Jehova Dios llakipayasqanmanta

Ninive llaqtapim mana allin runakuna yacharqaku, chay llaqtaqa karqa Asiria nacionpim. Jehova Diosmi willakuqnin Jonasta Ninive llaqtaman kacharqa willakamunanpaq, chaynapi runakuna mana allin ruwayninkuta saqinankupaq. Jonasmi ichaqa mana kasukuspan boteman qispiruspa Tarsis lawman ripukurqa.

Botepi richkaptinmi lamar quchapi llumpa-llumpay wayra-para qallaykurqa. Hinaptinmi chaypi kaqkuna llumpayta mancharikuspanku sapakama yupaychasqanku taytachankuta qayakurqaku, hinaspam ninakurqaku: “¿Imanasqataq kayna llakipi tarikunchik?”, nispa. Chaymi paykunata Jonas niykurqa: “Ñuqam huchayuqqa kani, ­Jehova Diosta mana kasukuspaymi ayqikuchkani. Chayraykuyá lamar quchaman wischuykuwaychik, hinaptinmi lamar quchaqa hawkayarunqa”, nispa. Botepi riqkunañataqmi mana munarqakuchu Jonastaqa lamar quchaman wischuytaqa, ichaqa Jonas “wischuykuwaychik” nispa hinalla niptinmi wischuykurqaku, chaymi wayra-paraqa manaña karqachu.

Jonasqa wañunantaña piensaspanmi Jehova Diosta mañakurqa, hinaptinmi Diosqa hatu-hatun challwata kamachirqa Jonasta millpurunanpaq. Millpuruptinmi Jonasqa challwapa wiksanpi Jehova Diosta qayakurqa kaynata: “Kunanmantaqa kasukullasqaykim”, nispa. Chaymi Jehova Dios llakipayaykuptin challwaqa kimsa punchawmanta Jonasta chaki allpaman aqtururqa.

Chaymantam Diosqa Jonasta Ninive llaqtaman kaqmanta kacharqa willakamunanpaq. Hinaptinmi Jonasqa Jehova Diosta kasukuspaña Ninive llaqtaman rirqa, hinaspanmi chay llaqtapi runakunata nirqa: “40 punchawmantam Ninive llaqtata Jehova Dios chinkachinqa”, nispa. Hinaptinmi runakunaqa mana allin ruwasqankuta saqirurqaku, chay llaqtapi kamachiqpas nirqam: “Tukuy sunquykichikwan Diosta mañakuspayá mana allin ruwasqaykichikmanta wanakuychik, icharaqpas kawsanchikman”, nispa. Wanakuspa tukuy ima ruwasqankuta qawaspanmi Diosqa llakipayariykuspan manaña wañuchirqachu.

Jonasmi ichaqa chaywan piñakururqa. Payta Dios llakipayaptinpas, payqa manam chay runakunataqa llakipayarqachu, aswanqa piñakuspam llaqtamanta lluqsiruspan purun calabaza plantapa sikinpi tiyaykurqa. Chaymantam chay calabazaqa chakirurqa, hinaptinmi Jonasqa llumpayta piñakururqa. Chaymi Jehova Dios nirqa: “Qamqa chay plantamantam astawanqa llakikurqanki. Chaynam ñuqapas Ninive llaqtapi yachaqkunata llakipayaykuspay mana castigarqanichu”, nispa. Chaynata nispam Jonasman yachachichkarqa runakuna ima plantamantapas aswan allin kasqanta.