Ezequiasta Jehova Dios yanapasqanmanta

Asiria nacionpi kamachiq Senaqueribmi Israel nacionpi 10 ayllukunataña munaychakururqa. Ezequiaspa kamachisqan Juda lawpi llaqtakunatapas munaychakuchkarqañam. Hinaspam Jerusalen llaqtatapas munaychakuytaña munarqa. Ichaqa manam yacharqachu Jerusalenta Jehova Dios waqaychasqanta.

Kamachiq Ezequiasqa Senaqueribmanmi achka qullqita quykurqa Jerusalenman mana yaykunanpaq. Chaywanpas Senaqueribqa tropankunatam kacharqa yaykunankupaq, chaymi runakuna mancharisqallaña karqaku. Hinaptinmi Ezequias nirqa: “Ama manchakuychikchu. Asiria tropakuna manchakuypaq kaptinpas Jehova Diosmi yanapawasun vencenanchikpaq”, nispa.

Senaqueribmi rabsaqueta utaq vino haywaq soldadonta kacharqa Jerusalenpi runakunamanta burlakunanpaq, chaymi rispan llaqtapa hawa lawninmanta kallpawan nirqa: “Jehova Diosnikichikqa manam yanapasunkichikchu. Ezequiasqa llullakusuchkankichikmi, manam pipas yanapasunkichikchu”, nispa.

Chaymi Ezequiasñataq Jehova Diosta tapurqa ima ruwananmanta, hinaptinmi Jehova Dios nirqa: “Ama hukmanyaychu wak soldadopa ima nisqanwanqa, ñuqam yanapasqaykichik”, nispa. Chaymantam Senaqueribqa Ezequiasman cartakunata apachispan nirqa: “Ñuqaykuwanña hukllawakuychik. Diosnikichikqa manam yanapasunkichikchu”, nispa. Chaymi Ezequiasqa kaqmanta mañakuspan nirqa: “Qamlla Jehova Dios kasqaykita riqsinankupaqyá yanapaykullawayku”, nispa. Hinaptinmi Jehova Dios nirqa: “Asiria nacionqa manam munaychakusunkichikchu, ñuqam Jerusalen llaqtaytaqa yanapasaq”, nispa.

Senaqueribqa piensarqam Jerusalenqa makinpiña kasqanta. Jehova Diosmi ichaqa chullalla angelninwan 185.000 Asiria soldadokunata huk tutallapi wañurachirqa. Senaqueribñataqmi sapallanña llaqtanman kutikurqa. Chaynatam Jehova Diosqa nisqanman hina Jerusalen llaqtatawan Ezequiasta yanaparqa. Qamqa, ¿Jehova Diospichu hapipakuwaq karqa Jerusalenpi kaspayki?