Runakunaman Esdraspa yachachisqanmanta

70 watamantam Israel runakunaqa Jerusalenman kutirqaku. Wakinkum ichaqa hinallaraq Persia nacionpi yacharqaku. Hukninmi karqa sacerdote Esdras. Payqa Jehova Diospa kamachikuyninkunamanta yachachiqmi karqa. Esdrasqa Jerusalenpi kaq Israel runakuna Diospa kamachikuyninkunata mana kasukusqanmanta yacharuspanmi riyta munarqa paykunata yanapaq. Persia nacionta kamachiq Artajerjesñataqmi nirqa: “Munaqkunawan Jerusalenman riruy. Diosmi yachayta quykusunki kamachikuyninkunamanta yachachinaykipaq”, nispa. Esdrasqa Jerusalenman riyta lliw munaqkunawanmi huñunakurqa. Allinlla chayanankupaqmi Diospa yanapakuyninta mañakurqaku.

Tawa killamanta Jerusalenman chayaruptinkum llaqtapi kamachiqkuna Esdrasman kaynata willarqaku: “Israel runakunaqa Jehova Diosta qipancharuspankum taytacha-mamacha yupaychaq warmikunawan casarakurunku”, nispa. Esdrasñataqmi lliw runakunapa qayllanpi qunqurakuykuspan Diosta mañakurqa: “Diosnilláy, tukuy imata quwachkaptikikupas qayllaykipim huchallikuruniku”, nispa. Israel runakunaqa wanakuspankupas hinallam mana allinta ruwarqaku. Chaymi Esdrasqa juezkunatawan autoridadkunata akllarqa. Paykunaqa kimsa killapim Diosta mana kasukuqkunata lliwta qarqururqaku.

12 wata pasaruptinmi Jerusalenpa muyuriqnin pirqakunata musuqmanta hatarichiyta tukururqaku. Chaymi Esdrasqa lliw Israel runakunata huñurachirqa Diospa kamachikuyninkunata leepunanpaq. Kamachikuykunamanta rimaq librota kichaykuptinmi llapallan runakuna sayarirqaku. Esdrasñataqmi kusikuywan Jehova Diosta hatuncharqa. Paykunapas makinkuta huqarispankum Diosta hatuncharqaku, hinaspapas Esdraspa yachachisqanta uyarispankum huchankuta riqsikuspa waqarqaku. Paqarinnintinpas paykunapaq hinalla leepuptinmi yacharurqaku Ramada sutiyuq fiesta ruwanankumanta, chaypaqmi allichakuyta qallaykurqaku.

Kusisqallañam qanchis punchaw Ramada fiestata ruwaspanku, kawsayninku allin qispisqanmanta Diosta agradecekurqaku. Manam chaynataqa ruwarqakuchu Josueypa tiemponmantapacha. Chay fiesta tukuruptinmi huñunakuruspanku Jehova Diosta mañakurqaku: “Jehova Diosllayku, qanmi Egiptomanta hurqumuwarqankiku. Chunniqpim mikuchiwarqankiku, hinaspam kay sumaq allpata quwarqankiku. Qanmanta willawaqniykuta mana kasukuptiykupas achka kutipim llakipayaykuwarqankiku. Qamqa Abrahanwan rimasqaykiman hinam ruwarqanki. Kunanmantaqa kasukullasqaykikum”, nispa. Chaymantam kasukunankupaq chayna rimasqankuta qillqarqaku, chaytam sacerdotekuna, levitakuna hinaspa kamachiqkuna sellaspanku firmarqaku.