Jerusalenpa muyuriqninta pirqasqankumanta

Israel nacionniyuq Nehemiasmi Persia nacionpi Susa llaqtapi yacharqa. Payqa kamachiq Artajerjespa sirvientenmi karqa. Huk punchawmi Nehemiaspa wawqin chayaramurqa Juda nacionmanta, hinaspam willarqa: “Israel runakunam mana pirqayuq llaqtapi yachachkanku. Babilonia runakuna tuñichisqankumantapacham punkuwan muyuriqnin pirqakunapas mana allichasqa kachkan”, nispa. Hinaptinmi Nehemiasqa llumpayta llakirikuspan Diosta mañakurqa: “Diosnilláy, kamachiq Artajerjesyá saqiykuwachun Jerusalenman rinaypaq”, nispa.

Chaymantam Artajerjesqa Nehemiasta tapurqa imanasqa llakisqa kasqanmanta, chaymi Nehemiasñataq nirqa: “Jerusalen llaqtaypa pirqankuna tuñisqa kaptinmi llakisqa kachkani”, nispa. Chaynata willakuptinmi Artajerjesqa tapurqa: “¿Imatataq ruwayman yanapanaypaq?”, nispa. Hinaptinmi Nehemiasqa Diosta mañakuykuspan Artajerjesta nirqa: “Ama hina kaspayá Jerusalenpa lliw muyuriqninta musuqmanta pirqamunaypaq saqiykullaway”, nispa. Kamachiq Artajerjesñataqmi rinanpaq saqiykuspan tukuyta ruwarqa allinlla chayananpaq. Chaymantapas Juda nacionpi autoridad kananpaqmi Nehemiastaqa churaykurqa, hinaspam tablakunatapas punkupaq quykurqa.

Nehemiasqa Jerusalenman chayaruspanmi pirqankuna tuñisqa kasqanta qawarqa, chaymi sacerdotekunatawan autoridadkunata nirqa: “Kaqmantam pirqananchik”, nispa. Chaynapim runakunaqa “arí” nispanku pirqayta qallaykurqaku.

Ichaqa chiqniqninku runakunam paykunamanta asikuspanku nirqaku: “Atuqllaraqmi pirqasqaykichiktaqa tuñirachinqa”, nispa. Chayna asikuptinkupas pirqaqkunaqa mana kasuspam hinalla pirqarqaku.

Chayta qawaspankum chiqniqninkunaqa tuñichinankupaq rimanakururqaku, chaymi Juda runakunaqa llumpayta mancharikurqaku. Ichaqa Nehemiasmi kallpancharqa: “Ama manchakuychikchu. Jehova Diosmi ñuqanchikwanqa kachkan”, nispa. Hinaspam pirqaqkunata mana imananankupaq soldadokunata churarurqa.

52 punchawllapim pirqayta hinaspa punku ruwaytapas tukururqaku. Chaymi Nehemiasqa Leviy runakunata takinankupaq qayachirqa. Paykunam qispiruspanku pirqapa hawanta Jehova Diospaq takistin muyurqaku. Wakin takiqkunam Esdraswan waklawninta muyumurqaku, wakinñataqmi Nehemiaswan kaylawninta. Hinaspam arpakunatapas tocastin Diospa wasinman chayarurqaku, chaypim hatunpas taksapas kusikuyllawanña Jehova Diospaq animalta kañapurqaku. Jerusalenpi kusisqallaña takisqankuqa karukamaraqmi uyarikurqa.