Elisabet wawayuq kasqanmanta

Jerusalenpa pirqankunata kaqmanta hatarichisqankumantam 400 wataña pasarurqa. Jerusalenpa hichpanpim sacerdote Zacariaswan warmin Elisabet yacharqaku. Paykunaqa unay wataña casarasqa kaspankupas mana churi-wawayuqmi karqaku. Huk kutipim Diospa wasinpi miski asnaq inciensota Zacariasqa Diospaq kañapuchkaptin Gabriel sutiyuq angel rikuriykurqa. Zacariasñataqmi rikuruspan llumpayta mancharikurqa. Chaymi angelqa nirqa: “Ama manchakuychu. Jehova Diosmantam allin willakuyta apamuchkayki. Warmiki Elisabetmi qari wawata wachakunqa, sutinmi kanqa Juan. Payqa Jehova Diospaq sapaqchasqam kanqa”, nispa. Chaynata niptinmi Zacarias nirqa: “¿Imaynatam yachayman chayna kananmantaqa? Ñuqaykuqa yuyaqñam kaniku, manañam churi-wawayuqqa kaymankuchu”, nispa. Angelñataqmi nirqa: “Diosmi kachamuwarqa kay sumaq willakuykunata willanaypaq. Ichaqa iskayrayasqaykiraykum churiki nacenankama rimayta mana atinkichu”, nispa.

Diospa wasinmanta Zacarias lluqsiramuptinmi runakuna tapurqaku imanasqa unamusqanmanta. Zacariasmi ichaqa rimayta manaña atirqachu, señasllawanñam rimarqa. Chaynapim runakunaqa musyarurqaku Dios payta rimapayarusqanta.

Chaymantam angelpa nisqanman hina Elisabetqa wiksayakuruspan qari wawata wachakururqa. Chaymi riqsinakusqankunawan ayllunkuna watukuspanku kusikurqaku, Elisabetñataqmi willarqa wawanpa sutin Juan kananmanta. Paykunañataqmi nirqaku: “Manam pipas aylluykipiqa chayna sutiyuqqa kanchu. Taytan hinayá sutichakuchun”, nispa. Zacariasmi ichaqa qillqarqa: “Sutinqa Juanmi”, nispa. Chaynata qillqachkaspanmi chayraq rimayta atirurqa. Wawamanta enteron Judeapi runakuna yacharuspankum nirqaku: “¿Imaraq kay wawaqa kanqa?”, nispa.

Zacariasñataqmi Diospa atiynin huntaykuptin nirqa: “¡Jehova Diosyá hatunchasqa kachun! Paymi Abrahanman willarqaña salvawaqninchik akllasqan runata kachamunanmanta. Churiy Juanqa chay Diospa akllasqan runamanta willakuqmi kanqa”, nispa.

Qatiqninpim yachasun Maria sutiyuq sipasmanpas Jehova Diospa angelnin rikuriykusqanmanta, Mariaqa Elisabetpa ayllunmi karqa.