Jesusmanta Juanpa willakusqan

Juanpa taytanpa sutinmi Zacarias karqa, mamanpañataqmi Elisabet. Juantaqa Diosmi willakuqnin kananpaq akllarqa, chaymi payqa Jehova Diospa akllasqan runa hamunanmanta willakurqa. Juanqa manam huñunakuna wasikunapichu nitaq llaqtakunapichu willakurqa, aswanqa chunniqpim. Achka runakunam Jerusalenmanta hinaspa enteron Judeapi llaqtakunamanta Juanpa willakusqanta uyariq riqku. Paykunatam Juan yachachirqa mana allin ruwaykunata saqispa Diostaña kusichinankupaq. Chaymi huchankumanta wanakuspa Jordan mayupi Juanwan achka bautizachikurqaku.

Juanqa camellopa qarallanwanmi pachakuq, mikurqapas aqarway urutawan abejapa añankunallatam. Runakunam pim pay kasqanmanta yachayta munarqaku, hatuntukuq fariseo runakunawan saduceo runakunapas Juanmanmi rirqaku, hinaptinmi Juanqa paykunata nirqa: “Sunqumantam wanakunaykichik, manam Abrahanpa churinkuna kasqaykichikraykullachu Jehova Diospa churinkunaqa kankichik”, nispa.

Chaymi achka runakuna Juanta tapurqaku: “¿Imatataq ruwaymanku Jehova Dios chaskiwanankupaq?”, nispa. Juanñataqmi nirqa: “Pipapas pachan iskay kaptinqa mana pachayuq kaqmanyá hukninta quchun”, nispa. Chaywanmi nichkarqa runamasinkuta kuyanankupaq, chaynapi paykunata Jehova Dios churinkunata hina chaskinanpaq.

Impuesto mañaqkunatam nirqa: “Amam pitapas llullakunkichikchu nitaq suwakunkichikpaschu”, nispa. Soldadokunatapas nirqam: “Amam imatapas chaskikunaykichikraykullaqa pimanpas sayapakunkichikchu nitaq llullakunkichikchu”, nispa

Chaymantam sacerdotekunawan Leviy runakunapas Juanta nirqaku: “Lliw runakunam qanmanta yachayta munachkanku”, nispa. Juanñataqmi paykunata nirqa: “Isaiaspa willakusqanman hinaqa ñuqam chunniqpi Diosmanta willakuchkani, chaynapi Diosman asuykunaykichikpaq”, nispa.

Runakunaqa anchatam munaqku Juanpa yachachisqanta uyariyta. Chaymantapas achkam tapukurqaku: “¿Paychu kanman Diospa akllasqan runa?” nispanku. Chaymi Juanqa paykunata nirqa: “Diospa akllasqan runaqa ñuqamantapas aswan atiyniyuqmi. Ñuqaqa manam usutallantapas hurqunaypaq hinachu kani. Qamkunataqa yakullawanmi bautizaykichik, paymi ichaqa chuya espirituwan bautizasunkichik”, nispa.