Samaria llaqtayuq warmiwan Jesus rimasqanmanta

Pascua fiesta tukuytam Jesusqa qatiqninkunawan Galilea llaqtaman kutichkarqaku, hinaspankum Samaria lawpi Sicar llaqtaman chayarurqaku, chaypim karqa Jacobpa yaku tomanan pozo. Chay pozopi Jesus samanankamam qatiqninkunaqa mikuy rantiq rirqaku.

Hinaptinmi Samariamanta warmi yaku hurquq hamururqa. Yakuta Jesus mañakuptinmi chay warmiqa tapurqa: “¿Imanasqam rimapayawanki? Judiokunaqa manam Samaria runakunawanqa rimankuchu”, nispa. Jesusñataqmi nirqa: “Pim kasqayta yachaspaykiqa, qanmi yakuta mañakuwankiman, hinaptinmi kawsay qukuq yakuta quykiman”, nispa. Warmiñataqmi nirqa: “Señor, manataq imallaykipas kanchu yakuta hurqunaykipaqqa”, nispa. Jesusñataqmi nirqa: “Ñuqapa qusqay yaku tomaqqa manañam haykapipas yakunayachikunqañachu”, nispa. Chaynata niptinmi chay warmiqa nirqa: “Señor, chay yakutayá quykullaway”, nispa.

Chaymantam Jesusqa chay warmita nirqa qusanta qayamunanpaq. Chay warmiñataqmi willakurqa mana qusayuq kasqanta, chaymi Jesus nirqa: “Imam kaqtam willaykuwanki, qamqa pichqa kutikamam casarakurqanki, kunanñataqmi huk runawanña mana casarakuspa yachachkanki”, nispa. Chayta uyariruspam warmiqa nirqa: “Diosmanta willakuqmi kasqanki. Ñuqaykuqa ninikum kay urqupi Diosta yupaychanaykupaq, qamkunam ichaqa ninkichik Jerusalenllapi yupaychanapaq. Diospa akllasqan runa chayamuptinñam yachasun imaynata Diosta yupaychanapaq”, nispa. Chaynata niptinmi Jesus nirqa: “Ñuqam kani Diospa akllasqan runa”, nispa. Chaytaqa Jesusqa manam pimanpas willakurqaraqchu.

Chayta yacharuspanmi chay warmiqa llaqtanman kutispa llaqtamasinkunata nirqa: “Hamuychik hinaspa tukuy ima ruwasqaymanta niwaqniy runata qawamuychik. Ichapas payqa Diospa akllasqan runa”, nispa. Hinaptinmi Samaria runakunaqa Jesuspa yachachisqanta uyariq rirqaku.

Chaymantam Jesusta nirqaku paykunawan qipakunanpaq, chaymi Jesusqa paykunawan qipakuspan iskay punchaw yachachirqa. Yachachisqanta uyarispankum achka paypi iñikurqaku, chaymi Samaria llaqtayuqkunaqa warmita nirqaku: “Kunanqa yachanikuñam kay runaqa lliw runakunata salvaq kasqanmanta”, nispa.