Samana punchawpi Jesus sanoyachisqanmanta

Fariseo runakunam Jesusta chiqnirqaku, chaymi imaraykupas presochayta munarqaku. Paykunaqa sabado punchaw samanapaq kasqanraykum mana munarqakuchu unquqkunata Jesus sanoyachinantaqa. Ichaqa sabado punchawpim Jesusqa callepi rikururqa limosnakuq ñawsachata, hinaspam qatiqninkunata nirqa: “Kunanmi Diospa atiyninta qawankichik”, nispa. Chaymantam tuqayninwan mituta ruwaykuspan chay ñawsa runapa ñawinman llusiykurqa, hinaspanmi nirqa: “Siloam sutiyuq pozopiyá upakaramuy”, nispa. Chay runaqa upakaramuspanmi qawarikururqaña. Payqa nacesqanmanta ñawsa kasqanraykum wamaq qawarikururqa.

Runakunañataqmi qawarayaspanku nirqaku: “¿Kay runaqa limosnakuqchus? ¿Icha huk runachu payman rikchakuq?”, nispa. Chaymi qawarikuruqpas nirqa: “Arí, ñuqam kani”, nispa. Hinaspapas imanasqa qawarikurusqanmanta tapuptinkum lliwta willakurqa. Runakunañataqmi willakusqanta uyariruspanku fariseokunaman pusarurqaku.

Chaymi fariseokunamanpas willakurqa: “Jesusmi ñawiyman mituta llusiykuwarqa, hinaptinmi upakaramuspay qawarikuruni”, nispa. Fariseokunañataqmi piñakuruspa nirqaku: “Samana punchawpi hampispanqa manam Diospa atiyninwanchu Jesusqa hampichkan”, nispa. Wakinkuñataqmi nirqaku: “Chayna kaptinqa manachiki hampiyta atinmanchu”, nispa.

Fariseokunaqa qawarikuruq runapa tayta-mamantapas qayarachispankum tapurqaku: “Kay warmaykichikqa ñawsam nacerqa ¿aw? ¿Imanasqataq kunanqa qawakuchkanña?”, nispa. Chay tiempopiqa fariseokunam nirqaku Jesusmanta pipas allin rimaqqa huñunakuna wasimanta qarqusqa kananmanta. Chaymi chay runapa tayta-mamanqa manchakuspanku nirqaku: “Kikintayá tapuychik, manam ñuqaykuqa yachanikuchu”, nispa. Hinaptinmi tapupayaptinku chay qawarikuruq runaqa nirqa: “Ñam willarqaykichikña, ¿imanasqataq tapupayawankichik?”, nispa. Fariseokunañataqmi piñakuruspanku qarqururqaku.

Chaymantam Jesusqa chay qawarikuruq runata tapurqa: “¿Iñinkichu Diospa akllasqan runapi?”, nispa. Chay runañataqmi nirqa: “Pim kasqanta yachaspayqa iñikuymanmi”, nispa. Jesusñataqmi nirqa: “Ñuqam Diospa akllasqan runaqa kani”, nispa. Hinaptinmi chay runaqa Jesuspa qatiqninña karqa. Jesusqa manam hampiyllachu-hampiykurqa, qatiqnin kananpaqpas yanapaykurqam.