Jesusta Pedro qipanchasqanmanta

Manaraq presochachkaptinkum Jesusqa mikusqanku wasipi apostolninkunata nirqa: “Qamkunam kunan tuta saqiruwankichik”, nispa. Hinaptinmi Pedro nirqa: “Hukkuna saqisuptikipas ñuqaqa manapunim saqisqaykichu”, nispa. Jesusmi ichaqa nirqa: “Manaraqpas gallo waqachkaptinmi kimsa kutikama mana riqsiwasqaykita ninki”, nispa.

Caifaspa wasinman Jesusta pusaruptinkum yaqa lliw apostolninkuna ayqikurqaku. Iskayllañam qatirqaku, hukninmi karqa Pedro. Paymi Caifaspa pationpi ninapi qunikuchkarqa, hinaptinmi Caifaspa sirvientan nirqa: “¡Riqsikim! ¡Qampas Jesuswanmi purichkarqanki!”, nispa.

Hinaptinmi Pedro nirqa: “Manam. Imatach rimachkankipas”, nispa. Punkuman pasakuptinpas Caifaspa huknin sirvientanmi runakunata nirqa: “¡Kay runapas Jesuswanmi purichkarqa!”, nispa. Pedroñataqmi nirqa: “¡Manam Jesustaqa riqsinipaschu!”, nispa. Hinaptillanmi huk runapas nirqa: “Qamqa kanki Jesuspa hukninmi, Galilea runa hina rimasqaykipas sutillam, Jesuspas chaynatam riman”, nispa. Pedrom ichaqa juraspanraq nirqa: “¡Manam riqsinichu!”, nispa.

Hinaptinmi gallo waqaramurqa. Pedro qawariykuptinmi Jesuspas qawamuchkasqa, chaymi Jesuspa nisqanta yuyariruspan hawaman lluqsirurqa, hinaspam aminankama waqakurqa.

Judiokunapa cortenpi kaq autoridadkunam Caifaspa wasinpi huñunakuruspanku Jesusta wañuchinankupaq rimanakururqaku. Ichaqa manam Jesuspa mana allin ruwasqantaqa tarirqakuchu, chaymi Jesusta Caifas tapurqa: “¿Diospa churinchu kanki?”, nispa. Hinaptinmi Jesus “arí” niykuptin Caifas nirqa: “¡Diostam kamichkan! ¿Imataraqtaq tapuchwan?”, nispa. Chayta uyariruspankum autoridadkunaqa nirqaku: “Wañunanmi”, nispa. Hinaspapas Jesustam laqichurqaku, tuqarqaku, uyantapas ­tapaykuspankum takarqaku, hinaspam nirqaku: “¡Diosmanta willakuq kaspaykiqa, niwaykuyá pim takasusqaykita!”, nispa.

Achikyaruptinmi Jesusta judiokunapa juzgananku corteman pusarqaku, hinaspam kaqmanta tapurqaku: “¿Diospa churinchu kanki?”, nispa. Jesusñataqmi nirqa: “Arí, qamkunam nichkankichik”, nispa. Chaymi “Diostam kamichkan” nispanku Poncio Pilato runaman pusarqaku. Payqa karqa Roma nacionta kamachiq runapa churasqan autoridadmi.