Jesuspa kawsarisqanmanta

Jesus wañukuptinmi Josey sutiyuq apu runa Pilatopata rispan Jesuspa cuerponta mañakurqa. Pilato “arí” niykuptinmi Joseyqa Jesuspa cuerponta qirumanta uraykachispan fino telawan hinaspa miski asnaq qurakunawan wankururqa, hinaspam manaraq pipapas pampakusqan sepulturaman churaykuspan hatun rumiwan sepulturata tapachirqa. Chaymantam riqsisqa sacerdotekuna Pilatota nirqaku: “Jesuspa cuerponta suwaruspankum ‘kawsariramunmi’ niwanchikman, chaymi imallatapas ruwananchik”, nispa. Pilatoñataqmi nirqa: “Sepulturatayá allinta tapaychik, hinaspa soldadokunata churaychik cuidanankupaq”, nispa.

Kimsa punchawmantam warmikuna tutapaylla Jesuspa sepulturanman  rirqaku, hinaspam tarirurqaku rumita suchuchisqataña. Sepultura ukupiqa Diospa angelninmi kachkasqa. Paymi nirqa: “Ama manchakuychikchu, Jesusqa kawsarirunmi. Qatiqninkunatayá nimuychik Galileaman rispa paywan tupanankupaq”, nispa.

Maria Magdalenam chaylla Pedrotawan Juanta tariruspan nirqa: “Jesuspa cuerpontam aparusqaku”, nispa. Chaymi qawaq kallparqaku, ichaqa Jesuspa cuerponta mana tarispankum kutikurqaku wasinkuman.

Chaymantam Mariaqa sepulturaman kutispan iskay angelkunata chaypi rikururqa, hinaspam nirqa: “Señortam sepulturamanta hurqurusqaku, manam yachanichu mayman churarusqankutapas”, nispa. Hinaspanmi huk runata rikururqa, huerta allichaq kasqanta piensaspanmi nirqa: “Niykullaway taytáy, maymantaq churarunki”, nispa. Chay runa “¡Maria!” niptinmi Mariaqa musyarurqa Jesus kasqanta, hinaspam paymanta hapipakururqa. Jesusñataqmi nirqa: “Willamuy wawqiykunaman rikuwasqaykimanta”, nispa. Chaymi Mariaqa chaylla willakuq rirqa.

Hina chay punchawllam Jesuspa iskay qatiqninkunaqa Jerusalenmanta Emaus sutiyuq llaqtaman richkarqaku. Hinaptinmi huk runa imamanta rimasqankuta tapuspan asuykurqa, paykunañataqmi nirqaku: “¿Manachu yachanki? Ñam kimsa punchawña Jesusta wañurachisqankuqa, kunanqa warmikunam rimachkanku kawsariramusqanmanta”, nispa. Chaymi chay runa nirqa: “¿Diosmanta willakuqkunamantachu iskayrayankichik? Paykunaqa nirqakum Diospa akllasqan runa wañukuspan kawsarimunanmanta”, nispa. Hinaspam Diospa palabranmanta paykunaman aswanraq yachachirqa. Emaus llaqtaman chayaruptinkum paykunawan qipakunanpaq nirqaku. Chaymantam mikuchkaptinku chay runaqa tantata hapiykuspa Diosta mañakurqa, hinaptinmi paykunaqa chayraq riqsirurqaku Jesus kasqanta, Jesusñataqmi chinkarurqa.

Chaymi Jesuspa chay iskay qatiqninkunaqa utqaylla Jerusalenman kutirqaku, chaypim huk wasipi apostolkunata huñunasqata tariruspanku Jesuswan tuparusqankumanta willarqaku. Hinaptinmi Jesusqa paykunaman rikuriykurqa, Jesus kasqanmanta iskayrayaptinkum paykunata Jesus nirqa. “Llachpaykuwaychik, makiytapas qawaykuychik, ñuqam kani. Qillqasqam karqa Diospa akllasqan runa kawsarimunanmanta”, nispa.