Challwa hapiqkunaman Jesus rikuriykusqanmanta

Apostolninkunaman Jesus rikuriykusqan qipallamanmi Pedroqa Tomaswan, Santiagowan, Juanwan hinaspa wakinkunapiwan Galilea lamar quchapi tukuy tuta challwarqaku, ichaqa manam chullallatapas hapirqakuchu.

Achikyamuqtam quchapa patanpi runata rikururqaku. Chay runam nirqa: “¿Hapirunkichikchu chullallatapas?”, nispa. Paykuna “manam” niptinkuñataqmi, chay runa nirqa: “Botepa alliq lawninman mallaykichikta wischuychik”, nispa. Wischuykuspankum achkallay-achka challwata hapirurqaku. Hinaptinmi Juanqa Jesus kasqanta musyaruspan nirqa: “¡Jesusmi kasqa!”, nispa. Pedroñataqmi yakuman chaylla pawaykuspan nadiastin Jesusman chayarurqa. Wakinkuñataqmi botewan qatirqaku.

Yakupa patanman chayaruspankum Jesustaqa ninapi challwa kankachkaqta tarirurqaku, tantapas kachkasqam. Chayllaraq hapimusqanku challwata apamunankupaq niruspanmi Jesusqa nirqaraq: “Mikuykuqyá hamuychik”, nispa.

Mikuyta tukuruptinkum Pedrota Jesus tapurqa: “¿Challwakunamantapas astawanchu kuyawanki?”, nispa. Pedrom nirqa: “Arí, kuyasqaytaqa yachankim”, nispa. Hinaptinmi Jesus nirqa: “Chaynaqa, chitachaykunatayá mikuchiy”, nispa. Kaqmantam Jesusqa payta nirqa: “Pedro, ¿kuyawankichu?”, nispa. Pedroñataqmi nirqa: “Arí, qamqa yachankim kuyasqaytaqa”, nispa. Jesusñataqmi nirqa: “Ovejachaykunatayá michiy”, nispa. Kimsa kutipi Jesus tapuptinmi Pedroqa llakirikuspan nirqa: “Señor, qamqa tukuy imatam yachanki, qamqa yachankipunim kuyasqaytaqa”, nispa. Chaymi Jesus nirqa: “Ovejachaykunatayá mikuchiy”, nispa. Nirqataqmi: “Hinallayá qatiway”, nispapas.