Chuya espirituta chaskisqankumanta

10 punchawña hanaq pachaman Jesuspa ripukusqan pasaruptinmi qatiqninkunaqa chuya espirituta chaskirqaku, chayqa karqa 33 watapi pentecostes fiestapim. Chay fiestamanmi huklawkunamantapas achkallaña runakuna Jerusalenman rirqaku. Jesuspa 120 qatiqninkunam wasipa altosninpi huñunasqa kachkarqaku, hinaptinmi qunqayllamanta sapakamapa umankupi linwachkaq nina hina rikurirurqa. Chaynatam llapallanku chuya espirituta chaskispanku huk rimaykunapiña sapakama rimayta qallaykurqaku. Chaymantapas chay wasipim sinchi wayrapa qaparisqan uyarikururqa.

Chayta uyarispankum huklawmanta hamuqkunapas chay wasiman kallparqaku ima kasqanta yachanankupaq. Chayaruspankuñataqmi uyarirurqaku Jesuspa qatiqninkuna huk rimaykunapiña rimasqankuta, hinaspam nirqaku: “¡Imaynamá Galilea runakunaqa rimayninchikkunapiña rimachkanku!”, nispa.

Hinaptinmi Pedrowan apostolmasinkuna llapallankupa qayllanpi sayaykurqaku. Chaypim Pedro nirqa: “Jesusta wañurachiptikichikpas Diosmi kawsarirachin. Kunanqa Jehova Diospa alliq lawninpiñam kachkan, hinaspapas niwasqankuman hinam chuya espirituta quykuwanku. Chayraykum kaykunata qawachkankichik”, nispa.

Chaywanmi runakunaqa qawarayarqakuraq. Pedropa chayna rimasqan sunqunkuman chayaruptinmi tapukurqaku: “¿Imatataq ruwallaymanku?”, nispa. Pedroñataqmi nirqa: “Huchaykichikmanta wanakuspayá Jesuspa sutinpi bautizakuychik, hinaspam chaskinkichik chuya espirituta”, nispa. Hinaptinmi 3.000 runakuna chay punchawlla bautizakururqaku. Chaymantapacham Jesuspa qatiqninkunaqa astawan yapakurqaku. Jesuspa apostolninkunaqa chuya espiritupa yanapakuyninwanmi iñiqmasinkuta yanaparqaku achka hawaqpiña huñunakunankupaq. Chaynapimá yachachirqaku Jesuspa lliw kamachisqankunata.