Achka nacionkunapi willakusqankumanta

Kay pachapa cantonkama Diosmanta willakunankupaq Jesuspa kamachisqantam apostolkunaqa kasukurqaku. Chaymi 47 watapi Antioquiapi kaq iñiqkunaqa Pablotawan Bernabeyta kacharqaku achka llaqtakunapi Diosmanta willakamunankupaq. Chaynapim paykunaqa kusikuyllawanña Asia Menor lawpi Derbe, Listra hinaspa Iconio llaqtakunapi willakurqaku.

Pablowan Bernabeyqa apukunamanpas, wakchakunamanpas, uchuymanpas hatunmanpas llapallanmanmi Diosmanta willaqku. Achkallaña runakunamá paykunataqa uyariqku. Huk kutipim Chipre llaqtata kamachiq Sergio Paulo sutiyuq runaman Diosmanta willachkarqaku, ichaqa layqa ruwaq runam harkakurqa. Chaymi Pablo nirqa: “Qamqa Jehova Diostam piñachinki”, nispa. Chaynata niykuptillanmi chay layqa ruwaq runaqa ñawsayarurqa. Chayta qawaykuspanmi chay kamachiq runapas Jesuspa qatiqninña karqa.

Pablowan Bernabeyqa Diosmantam willakuqku wasin-wasin, mercadokunapi, ñankunapi chaynataq huñunakuna wasikunapipas. Listra llaqtapi kachkaspankuñataqmi suchu runata sanoyarachirqaku. Chayta qawaykuspankum runakunaqa dioskuna kasqankuta piensaspanku yupaychayta munarqaku. Pablowan Bernabeymi ichaqa nirqaku: “Jehova Diosllatam yupaychanaqa. Ñuqaykupas qamkuna hina runallam kaniku”, nispa. Chaymantam chay llaqtaman judiokuna chayarurqaku, hinaspam runakunata umacharurqaku Pablopa contranpi hatarinankupaq. Chaymi runakunaqa Pablota rumiwan chuqaparurqaku, hinaspam wañurusqanta piensaspanku llaqtamanta hurqururqaku. Ichaqa iñiqmasinkunam yanapaspanku kaqmanta llaqtaman aysarqaku. Chaymantam Pabloqa Antioquiaman kutirqa.

49 watapipas Pabloqa Asia Menor lawmanmi illarqa iñiqmasinkunata watukuq. Diosmanta willakustintaqmi rirqa Europa lawpi Atenas, Efeso, Filipos, Tesalonica hinaspa huklaw llaqtakunamanpas. Chay illasqanpim riysirqaku Silas, Lucas hinaspa Timoteo sutiyuq musu. Huk sunqulla kaspankum sapa llaqtapi Diosman iñikunankupaq achkata yanaparqaku, yanaparqakutaqmi allin iñiyniyuq kanankupaqpas. Chaymantapas Pabloqa wata partenmi Corinto llaqtapi iñiqmasinkunata kallpancharqa, chaypim runakunaman willakurqa, sapa llaqtapi iñiqmasinkunapaqpas cartakunatam qillqarqa. Carpakunata ruwaspantaqmi llamkapakuqpas. Chaymantam kutirqa Antioquia llaqtaman.

52 watapim apostol Pabloqa kimsa kaq illasqanpi Asia Menor lawpi llaqtakunata watukurqa. Filipos llaqtamanmi rirqa, chaymantam kutirqa Corinto llaqtaman. Chaymantañataqmi unay wata Efeso llaqtapi qiparqa. Chaypim yachachirqa, unquqkunata sanoyachirqa hinaspa iñiqmasinkunatapas yanaparqa. Chaymantapas sapa punchawmi achka runakunapa huñunakunankupi yachachirqa, chaymi achka runakuna mana allin ruwasqankuta saqispanku allin kaqtaña ruwarqaku. Tukuy hinastinpi Diosmanta willakuruspanmi Jerusalenman kutirqa.