JESUSPA QATIQNIN KANANPAQ YACHACHISPA
11 YACHACHIKUY
Entiendenanpaq hina yachachisun
Bibliapim nin: ‘Sasa entiendenata rimaptikichikqa, ¿imaynatataq pipas yachanman imamanta rimasqaykichikta?’, nispa (1 Cor. 14:9).
¿Imatam Jesus ruwarqa?
1. Qawaykuy VIDEOTA utaq leeykuy Mateo 6:25-27 nisqanta. Chaymantañataq qatiqnin tapukuykunapi yuyaymanay:
¿Imawanmi Jesus rikchanachirqa Jehova Dios cuidawasqanchikmanta yachachispan?
Jesusqa alton pawaqkunamanta tukuyta yachachkaspanpas ¿imanasqataq uyariqninkunapa riqsisqan kaqkunallamanta rimarqa? ¿Imanasqataq chayna yachachisqanqa allin karqa?
¿Imatam Jesusmanta yachachwan?
2. Chaylla entiendenankupaq yachachiptinchikqa runakunaqa manam qunqanqakuchu, hinaspapas sunqunkumanmi yachachisqanchik chayanqa.
Jesusta qatipakuy
3. Ama llumpaytaqa rimaychu. Estudiachisqaykimanqa ama llapan yachasqaykimantachu willaruy. Aswanqa estudiasqaykichik qillqapi kaq yachachikuyllamanta willay. Tapuspaykiqa pacienciawan suyaykuy ima ninanta. Ichaqa, ¿imatam ruwawaq tapusqaykimanta mana yachaptinqa utaq contestasqan bibliapa nisqanwan mana tupaptinqa? Huk tapuykunawan yanapay imam kaqta entiendenanpaq. Entienderuptinqa qatiqnin yachachikuymantaña yachachiy.
4. Estudiachisqayki runa imakunamantaña yachasqanta yuyarispa chayman hina yanapay musuq yachachikuykunata entiendenanpaq. Kawsarimuymanta yachanaykichik kaptinqa wañukuptinchik ima pasawasqanchikmanta yachasqaykichiktam puntata yuyarichiwaq.
5. Ima tupanachiywan yachachinaykipaq allinta akllay. Ima tupanachiywanpas manaraq yachachichkaspayki kaykunapi piensay:
“¿Chaylla entiendenapaqchu?”.
“¿Entiendenqachu estudiachisqay runa?”.
“Chay tupanachisqaywanqa, ¿imamanta yachachiy munasqaytachu yuyanqa icha tupachisqallaytachu?”.