Diosman asuykuychik
Sapakamapi interesakuq michiqmanta
“¿INTERESAKUNCHU Diosqa ñoqamanta?” Kaynataqa tapukurqankipaschá, ichaqa manam qamllachu chaynataqa tapukunki. Sasachakuykunapi tarikuspaqa tapukunchikmi tukuy ima Unanchaq Diosqa cuentata qokunchu ñakarisqaymanta nispa. Yachaytapunim munanchik Jehová Diosqa sapakamapi interesakusqanmanta. Jesusqa allintam reqsirqa Jehová Diosta chaymi kay Allpapi kachkaspan willakurqa huk kallpanchakuq rikchanachiyta chaywanmi qawachirqa taytanqa interesakuq kasqanta.
Sapa punchaw oveja michiqpa rurasqanmanta willaspanmi Jesus nirqa: “Pachak ovejayoq runapa huknin ovejan chullaruptinqa ¿manachum isqon chunka isqonniyoq ovejata saqeykuspan tarimunankama orqokunapi maskamunqa? Payqariki isqon chunka isqonniyoq mana chullaruq ovejakunamantapas mastaqa kusikunqa tarisqan kaqwanmi. Hanaq pachapi kaq Taytaykichikpas manam munanchu hukllanpas kay uchuychakuna chinkananta” nispa (Mateo 18:12-14). Yachasunchikyá chay rikchanachiywan imaynatam Jehová Diosqa sapakama serviqninkunamanta interesakusqanta.
Sapakama ovejankunamantam michiqqa interesakun. Sichum huknin chinkarun hinaptinqa yachanmi mayqan chinkasqanmanta. Kikinpa sutichasqanman hinam sapakama ovejanta sutinmantakama reqsin (Juan 10:3). Kuyakuywan michiqqa mana samaykuspanmi chullaq ovejanta maskan ataqonman kutichimunankama. Ichaqa chullaq ovejanta maskasqanraykuchuqaya 99 ovejankunataqa peligropi saqerunman. Oveja michiqkunaqa kuskalla kaspankum ovejankutapas chaqrunachiqku.a Chaymi ovejan chinkachikuqqa maskaq rinanpaq michiq masinman wakin ovejankunata saqepakuq. Michiqqa maynataraqchá kusirikuq chullaq ovejanta sanollata tarirusqanwanqa. Chaymi mancharisqa ovejanta hombrorikuspa ataqonman apan (Lucas 15:5, 6).
Rikchanachiymanta Jesus yachachispanmi nirqa, Diosqa manam munanchu hukllapas “kay uchuychakuna chinkananta” nispa. Discipulonkunaman yachachispanmi Jesusqa nirqaña ñoqapi “iñiq kay taksachakunamanta hukninta” pipas iñiyninpi hukmanyarachiqqa mana allinpi tukunanmanta (Mateo 18:6). Hinaptinqa ¿imatataq yachachiwanchik Jehová Diosmanta kay rikchanachiyqa? Jehová Diosqa michiq hinam sapakamapi interesakun ‘taksachakunamantapas’, kay pachapi mana valeqpaq hina qawaptinkupas. Chaymi serviqninkunataqa sapakamata Diosqa anchata chaninchan.
Sichum yachayta munanki qanmanta Dios interesakusqanta hinaptinqa ¿imanasqataq mana astawan yachankichu Allin Michiq Jehová Diosmanta hinaspa imaynatam payman asuykunamantapas? Chaynata ruraspaykiqa apostol Pedro hinam seguro kanki, payqa Jesusmantapunim uyarirqa chullasqa ovejamanta rikchanachispa willakusqanta. Chay uyarisqanmanta pasaq watakunallapim Pedro nirqa: “Tukuy afannikichiktaqa Diosmanyá qoychik, paymi qamkunamanta nanachikuqqa” nispa (1 Pedro 5:7).
[Willakuy]
a Chaqrunachisqankumanta ovejanku rakiyqa manam sasachu karqa ovejankuqa reqseqmi michiqninpa econta (Juan 10:4).