Diosninchiktayá kasukusunchik sonqonchikpi mana iskayrayaspa

“Yachachisqaykiman hina puriytayá yachachillaway. Qamtaña respetanaypaqyá iskayrayaq sonqoyta hukllaway.” (SAL. 86:11.)

1, 2. a) Salmo 86:2, 11 nisqanman hina, ¿imataq yanapawasun pruebakuna kaptinpas Jehová Diosta kasukunapaq? b) ¿Imakuna manaraq kachkaptinmi kallpanchakunanchik sonqomanta kasukunapaq?

¿IMANASQATAQ wakin wawqe-paninchikkunaqa unay tiempo qatikachasqa otaq carcelpi kasqankuta aguantaspankupas qollqe kuyayman wichiykunku? Chayqa sonqonkupi imayna kasqankumantam. Salmo 86 nisqanpim kasukuyta tupachin mana iskayrayasqa sonqowan. Kay Salmosta qellqaq Davidmi, kaynata mañakurqa: “Qanman sonqollaña kallasqayraykuyá waqaychaykuway. Qanman hapipakuq serviqllaykitayá salvaykullaway. Qamlla Diosnillayqa kasqaykiraykuyá salvaykullaway”, nispa. Nirqataqmi: “Dios Taytalláy, munasqaykiman hina kawsaytayá yachachillaway. Yachachisqaykiman hina puriytayá yachachillaway. Qamtaña respetanaypaqyá iskayrayaq sonqoyta hukllaway”, nispa (Sal. 86:2, 11).

² Jehová Diospi tukuy sonqonchikwan mana confiaptinchikqa, huk ruraykunañam kasukusqanchikta hukmanyachinqa. Kikillanchikpaq munaykunaqa purisqanchik ñanpi tuqllakuna hinam. Sasachakuy tiempokunapi Diosta kasukuq kaspanchikpas, Satanaspa toqllankunamanqa wichiykuchwanmi. Chaymi manaraq pruebakunawan tentacionkuna hamuchkaptin, kunan tiempopi kallpanchakunanchik sonqomanta Jehová Diosta kasukunanchikpaq. Bibliam nin: “Piensasqaykikunatayá [“sonqoykitayá”, NM] cuiday tukuy ima cuidasqaykimantapas mastaqa”, nispa (Pro. 4:23). Kaymantam sumaqta yachachwan Juda llaqtapi profetamanta yachaspa, paytam Jehová Dios kamachirqa Israelpi rey Jeroboanwan rimananpaq.

“Regalota qomusqayki”

3. ¿Imatam rey Jeroboanqa ruran Diospa kamachisqanta profeta willaptin?

³ Piensariy kaypi: Diospa profetanmi rey Jeroboanman rispan contranpi willan Diospa kamachisqanta, paymi toromanta taytachakunata churarun Israel llaqtapi chunka ayllukuna yupaychanankupaq. Chay willasqanmanta llumpayta piñakuruspanmi Jeroboanqa kamachin profetata hapinankupaq. Ichaqa Jehová Diosmi siervonta yanapan, chaymi Jeroboanpa hoqarisqan makin chakirurqa, chaynataq pantay dioskunapa altarninpas pakikururqa. Hinaptinmi rey Jeroboanqa humillakuspan kaynata nin: “Ruegaykapuway yupaychasqayki Tayta Diosta hinaspa mañaykapuway makillay kasqallan doblakunanpaq”, nispa. Profetañataqmi mañakun, hinaptinmi reypa makinqa sanoyarun (1 Rey. 13:1-6).

4. a) ¿Imanasqam reypa munachisqanqa pruebaman churarqa profetapa kasukuyninta? b) ¿Imatam profetaqa nirqa?

⁴ Chaymantam rey Jeroboanqa profetata kaynata nin: “Wasiymanyá hakuchik mikuykamunaykipaq chaypim regalota qomusqayki”, nispa (1 Rey. 13:7). ¿Imatam payqa ruranan? ¿Kasukunanchu contranpi rimachkaspanpas? (Sal. 119:113.) ¿Icha qepanchananchu rey wanakuchkaq hina kaptinpas? Jeroboanqa achka kapuqniyoqmi amistadninkunaman imakunatapas qonanpaqqa. Sichu Diospa profetan sonqonpi munan kapuqniyoq kayta, reypa munachisqantaqa munapayanqachá. Jehová Diosmi ichaqa profetata kaynata kamachirqa: “Amam mikunkichu nitaq yakutapas tomankichu amataqmi risqayki ñannintaqa kutimunkichu”, nispa. Chaymi profetaqa rey Jeroboanta nirqa: “Parten palacioykitaña qowaptikipas manam riymanchu qanwanqa nitaqmi mikuymanchu nitaqmi yakutapas tomaymanchu kay sitiopiqa”, nispa. Hinaptinmi profetaqa huk ñannintaña Betel llaqtamanta kutikurqa (1 Rey. 13:8-10). ¿Imatam profetapa rurasqan kasukuymanta yachachiwanchik? (Rom. 15:4.)

Kapuwaqninchikwan kusisqa kasunchik

5. ¿Imanasqataq Dios kasukuyninchikta pruebaman churanman kapuqniyoq kanapaq munayninchik?

⁵ Kay pachapi kapuqniyoq kanapaq munayqa pruebamanmi churan Dios kasukuyninchikta. ¿Confianchikchu Jehová Dios prometesqanman hina ima necesitasqanchikta qowananchikpaq? (Mat. 6:33; Heb. 13:5.) ¿Atichwanchu kawsayta kunan tiempopi mana tukuy imayoq kaspanchikpas? ¿Icha qollqenchik mana kaptinpas tukuytachu ruranchik chaykuna kapuwananchikpaq? (Leey Filipenses 4:11-13.) ¿Jehová Dios serviypi astawan llamkanamantaqa munanchikchu munasqanchikkuna maskayta? ¿Puntapichu kachkan vidanchikpi Jehová Dios serviyninchik? Kay tapukuykunata kutichinapaqqa, Jehová Diosta imayna servisqanchikmantam kanqa. Apostol Pablom kaynata qellqarqa: “Diosta servispaqa qori-qollqeta hinam tarirunchik kapuqninchikwan contentakuyta yachaspanchikqa. Nacespanchikqa kay pachamanqa manam imatapas apamurqanchikchu, chaynataqmi wañukuspanchikpas imatapas mana apasunchu. Pachanchikpas mikunanchikpas kaptinqa, chaywanyá contentakusun”, nispa (1 Tim. 6:6-8).

6. ¿Imatam “regalota” hina munanchikman, hinaspa imataq yanapawasun allinta tanteanapaq?

⁶ Ejemplopaq, ichapas llamkasqanchikpi patronninchik achka qollqeta tarinapaq huk ruraytaña munachiwanchikman. Otaq pipas munachiwanchikman huk nacionman otaq huk llaqtaman rispa llamkasqanchikpi allin pagasqa kanapaq. Qallariyninpiqa, chaykunataqa qawanchikmanchá Jehová Diospa bendicionninta hina. Ichaqa manaraq imatapas tanteachkaspam, tapukuna cheqaptapuni ima munasqanchikta. Astawanmi piensananchik chay tantearusqanchik qepaman Dioswan amistadninchik imayna kananmanta.

7. ¿Imanasqataq kapuqniyoq kay munayta sonqonchikmanta horqonanchik?

⁷ Satanaspa munaychakusqan runakunaqa kallpanchawanchikmi achka kapuqniyoq kanapaq (leey 1 Juan 2:15, 16). Chaykunapi Diablo urmarunanchikta munasqanraykum, rikchan-rikchanlla kananchik chaynapi kapuqniyoq kanapaq munaykuna sonqonchikpi sapichakuruptin horqonanchikpaq (Apo. 3:15-17). Jesucristoqa Satanastam qepancharqa kay pachapi gobiernokunata munachiptin (Mat. 4:8-10). Paymi kaynata nirqa: “Cuidakuychikyá qollqella kuyaruymanta. Runaqa manam tukuy imayoq karunallanpaqchu kawsanan”, nispa (Luc. 12:15). Kasukuq kaspaqa, Jehová Diospim confiasunchik manam kikillanchikpichu.

Yuyaq profetam engañarurqa

8. ¿Imaynatam profetapa kasukuyninqa pruebaman churasqa karqa?

⁸ Profetapa rurasqanqa allinpim tukunman karqa, kutisqan ñanpi mana samaptinqa. Ichaqa kutisqanpim kasukuynin pruebaman churasqa karqa. Bibliam nin: “Chay tiempopim Betel llaqtapi yacharqa Diosmanta willakuq yuyaqña runa, paypa churinkuna hamuruspanmi willarqa Betel llaqtapi Diospa runan imam rurasqanmanta”, nispa. Chaymi yuyaqña profetaqa churinkunata nirqa asnota alistamunankupaq chaynapi maskaq rinanpaq. Rispanmi hatun sachapa sikinpi samachkaqta tarirurqa, hinaspam nirqa: “Hakuwá wasiyta imallatapas mikuykamunaykipaq”, nispa. Ichaqa manamá munarqachu, chaymi yuyaq profetaqa kaynata nirqa: “Ñoqapas qam hina Diosmanta willakuqmi kani, angelmi Tayta Diospa nisqanta kaynata niwarqa: ‘Wasikiman pusamuy mikuspa yakuta tomaykunanpaq’”, nispa. Ichaqa Traducción del Nuevo Mundo nisqa Bibliapiqa willakunmi “engañarurqam” nispa (1 Rey. 13:11-18).

9. ¿Imatam Biblia nin llullakuqkunamanta, hinaspa pikunatam mana allinta ruranku?

⁹ Yuyaq profetapa imanasqa chayna rurasqantaqa manam yachanchikchu, ichaqa llullakurqam. Yaqapaschá punta tiempopiqa kasukuq profeta karqa, ichaqa kay kutipiqa engañarurqam, chaymi Bibliaqa anchata cheqnin chay ruraytaqa (leey Proverbios 3:32). Llullakuqkunaqa espiritualpim kikinku mana allinta rurakunku hinaspa wakinpiqa runamasinkutapas.

Yuyaqña profetawanmi pasakurqa

10. Judamanta profeta, ¿imatam rurarqa yuyaq profeta invitaptin, hinaspa imam pasarqa?

¹⁰ Judamanta profetaqa cuentatam qokunman karqa yuyaq profeta engañasqanmantaqa. Tapukunmanmi karqa: “Jehová Dios mosoq kamachikuyta qowananpaq kaptinqa, ¿imanasqataq huk angeltaqa kamachinman karqa huk runawan willawananpaq?”, nispa. Chaymantapas, mañakunmanchá karqa Jehová Diosta chayna kasqanmanta entiendechinanpaq, ichaqa Diospa Palabranqa manam ninchu chayna rurasqanmantaqa. Aswanmi nin, yuyaq profetawan “kutispa mikumurqa hinaspa yakutapas tomarqa”, nispa. Jehová Diosqa manam allintachu qawarqa chay rurasqantaqa. Chaymi Juda llaqtanman kutichkaptin huk leonwan tuparurqa hinaptinmi wañurachirqa. ¡Mana allinpimá tukururqa profeta hina llamkayninqa! (1 Rey. 13:19-25.)a

11. ¿Imanasqataq Ahiasqa allin profeta karqa?

¹¹ Ichaqa Ahias sutiyoq profetaqa manam chaynachu karqa, paymi kamachisqa karqa Jeroboanta rey hinata akllananpaq, payqa kasukuqmi karqa yuyaqña kaspanpas. Ahias profeta yuyaqña hinaspa ñawsa kasqanpim, rey Jeroboanqa warminta kamachirqa onqoq churinta ima pasananmanta tapunanpaq. Payñataqmi mana manchakuspan chay churin wañunanmanta willarqa (1 Rey. 14:1-18). Ahias profetaqa achka bendicionkunatam chaskirqa; huk kaqninmi karqa Diospa Palabran qellqasqa kananpaq yanapakusqan. ¿Imaynatam yanaparqa? Paypa qellqasqanmi tiempopa risqanman hina Esdrasta yanaparqa allinta qellqananpaq (2 Cro. 9:29).

12-14. a) ¿Imatam yachanchik Judamanta profetata ima pasasqanmanta? b) ¿Ima ejemplokunam qawachin ancianokunapa consejo qosqankupi yuyaymanay hinaspa imata tanteanapaqpas orakuy allin kasqanmanta?

¹² Juda llaqtayoq profeta, yuyaq profetawan mikuq hinaspa yaku upiaq rinanpaq Jehová Diosta imanasqa mana tapusqanmantaqa manam Bibliaqa willanchu. Yaqapaschá willarqa uyariy munasqallanta. ¿Imatam kaymanta yachachwan? Imaña kaptinpas Jehová Diostam kasukunanchik, hinaspam seguro kananchik tukuy kamachiwasqanchik allinninchikpaq kasqanta.

¹³ Wakinkunaqa consejota chaskispankuqa munasqallankutam uyariyta munanku. Piensarisun huk cristianopi, paymanmi munachinku huk llamkayta, ichaqa chay llamkayraykum saqenan ayllunman tiempo qosqanta hinaspa congregacionpi rurasqankunatapas. Congregacionpi ancianota yanapananpaq mañakuptinmi, payqa puntata nin: ancianokunaqa manam niymankuchu aylluykita imayna mantieninaykipaqqa nispa, hinaspam qawachin chay llamkayta chaskispan ima sasachakuykunapi tarikunanmanta. ¿Piensananchu ancianopa punta nisqallanpi, icha tukuyninpi nisqanpiwanchu? Astawanmi piensanan Dios serviyninpi imayna kananmanta.

¹⁴ Chaynataq piensarisun huk ejemplopipas. Huk cristianam congregacionpi ancianota tapun mana iñiq qosanwan rakikunanmanta. Ancianom puntataqa qawachin chayta kikin tanteakunanmanta hinaspam yuyarichin chay piensasqanmanta Bibliapa ima nisqanta (1 Cor. 7:10-16). ¿Cheqaptapunichu cristianaqa yuyaymananqa ancianopa nisqanpi? ¿Icha tantearurqañachu qosanta saqenanpaq? Manaraq imatapas rurachkaspam aswan allinqa kanman, Jehová Diospa consejonkunata maskaspa chaykunapi allinta yuyaymanay.

Amayá kikillanchikpiqa confiakusunchu

15. ¿Imatam yachanchik profetapa mana kasukusqanmanta?

¹⁵ ¿Imatawanmi yachanchik Juda llaqtamanta kaq profetapa mana kasukusqanmanta? Proverbios 3:5 nin: “[Jehová] Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa”, nispa. Judamanta profeta chay tiempokama hina Jehová Diospi confiananmantaqa, kikinpa piensasqallanpiñam confiayta qallaykurqa. Mana kasukusqanraykum wañururqa hinaspa Diospa favornintapas chinkarachirqa. Kaymi yachachiwanchik, Jehová Diosta kasukuspa chaynataq payllapi confiaspa servinamanta.

16, 17. ¿Imataq yanapawasun Jehová Diosta sonqomanta hinalla kasukunanchikpaq?

¹⁶ Sonqonchikqa kikillanchikpaqmi imatapas munan, chaymi mana allintapas niwasunchik. “Tukuy imamantapas engañakuqllañam runapa sonqonqa.” (Jer. 17:9.) Jehová Diosta kasukunapaqqa, kallpanchakunanchikmi ñawpaqpi imayna kasqanchikta saqenanchikpaq, chaykunam hatunchakuyman hinaspa kikillanchikpi confiakuyman aysawanchik. Aswanmi mosoqwan pachakuchkaq hina mosoq runaña kananchik, “chayna runatam Diosqa unancharqa cheqaptapuni mana huchallikuq justo kananpaq” (leey Efesios 4:22-24).

¹⁷ Proverbios 11:2 kaynata nin: “Humillakuq runakunaqa yachayniyoqmi kanqaku”, nispa. Jehová Diospi confiaspaqa, manachá pantarusunchu imakunatapas tanteaspaqa. Huk ejemplota qawasunchik. Hukmanyasqa kaspanchikqa yaqapaschá imakunatapas mana allinpaq qawasunchik (Pro. 24:10). Ichapas Jehová Dios serviyninchikpi pisiparunchik hinaspa piensayta qallaykuchwan llumpay llamkarusqanchikmanta hinaspa munanchikman hukkunaña chayna llamkanankuta. Chaynataq qallaykuchwanmi munasqallanchikman hina imatapas rurayta. Ichaqa anchata kallpanchakuspa chaynataq astawan Diospaq llamkaspanchikmi, sonqonchiktaqa waqaychasun (Luc. 13:24; 1 Cor. 15:58).

18. ¿Imatataq rurachwan imapas sasa tanteanapaq kaptin?

¹⁸ Ichapas wakin kutikunapiqa ima ruranapaq tanteayqa sasa kanqa, hinaspa mana yachachwanchu imayna rurayta. ¿Munanchikchu piensasqanchikman hinalla imatapas rurayta? Chayna kaspaqa Jehová Diosta mañakusun yanapawananchikpaq. Santiago 1:5 kaynata nin: “Mayqannikichikpapas yachaynikichik pisilla kaptinqa Diostayá mañakuychik, payllam qosunkichik. Lliw mañakuqninkunamanqa mana piñakuspam chaninninpi qoykun”, nispa. Diosninchikqa necesitasqanchik chuya espirituntam qowasunchik imatapas allinta tanteanapaq (leey Lucas 11:9, 13).

Haykapipas kasukuqyá kasunchik

19, 20. ¿Imatam sapa punchaw rurananchik?

¹⁹ Salomon cheqap yupaychayta saqeruptinmi sasachakuykuna qallaykurqa, chaynapim Diospa serviqninkunapa kasukuyninku pruebaman churasqa karqa. Arí, achkam imatapas ruraspanku mana kasukurqakuchu, ichaqa karqataqmi Diosta sonqomanta kasukuqkunapas.

²⁰ Sapa punchawmi Dios kasukuyninchikqa pruebaman churasqa kachkan imapaqpas tanteasqanchikwan, ichaqa kasukuq israelitakuna hinam Diospa munasqanman hina imatapas rurananchik. Chaynaqa sapa punchawyá Jehová Diosta kasukusunchik sonqonchikpi mana iskayrayaspa, hinaptinmi payqa hinalla bendeciwasun (2 Sam. 22:26, NM).

[Willakuy]

¿Imatam niwaq?

• Kapuqniyoq kanapaq munaykuna sonqonchikpi sapichakuruptinqa, ¿imanasqataq kallpanchakunanchik horqonanchikpaq?

• ¿Imataq yanapawasun sonqomanta Jehová Diosta kasukunapaq?

• ¿Imaynatam yanapawanchik kikillanchikpi mana confiakusqanchik Jehová Diosta hinalla kasukunapaq?

[13 kaq paginapi dibujokuna]

¿Anchatachu sasachakunki tentacionkuna kaptin atipayta?

[15 kaq paginapi dibujokuna]

¿Allintachu yuyaymananki Bibliamanta consejokuna chaskisqaykipi?