Diosman asuykuychik
Unanchawaqllanchiktam yupaychananchik
“¿IMAPAQTAQ kawsanchik?” Qampas kaynataqa tapukurqankipaschá. Ichaqa manam kayna tapukuytaqa contestayta atinkuchu runakuna monomanta rikurisqanta piensaqkunaqa. Diosllamanta ‘kawsakuy [. . .] hamusqanta’ creeqkunaqa yachankum chay tapukuypa kutichiyninta (Salmo 36:9). Apocalipsis 4:11 nisqanpi hinam yachanku imarayku unanchasqa kasqankuta. Kay textopim apostol Juan willawanchik imarayku kawsasqanchikmanta, chaymantayá yachasunchik.
Revelacionninpim Juan uyarin angelkunapa kayna takisqanta: “Señor Diosllayku, qamllam kanki tukuy atipayniyoq adorana hinaspa yupaychana Diosqa. Qanmi unancharqanki tukuy ima kaqkunataqa. Munaynikiman hina unanchaptikim kachkan tukuy imakunaqa”, nispa. Cheqapmá, Jehová Diosllam tukuy ima unanchasqanrayku yupaychaytawan respetotapas chaskinan. Chayna kaptinqa, ¿ima rurananchiktam Diosqa munanman?
Chay textopim yachachiwanchik Jehová Diosllata adoranamanta, yupaychanamanta hinaspa atiytapas qonamanta. Pay hina tukuy atiyniyoq mana pi kaptinpas yaqa lliw runakunam Unanchaqninkuta hina mana qawankuchu. Ichaqa Diosta respetaq warmi-qarikunaqa Diospa “llumpay atiyniyoq” kasqantam qawanku unanchasqankunapi (Romanos 1:20). Diosta kuyaspankum ‘adoranku’ hinaspa ‘yupaychanku’. Tukuy ima unanchasqankunata qawaspankum willakunku tukuy hinastinpi paylla unanchaq kasqanta, chayraykum respetananchik hinaspa yupaychananchik (Salmo 19:1, 2; 139:14).
Adoraciontawan yupaychayta chaskispanpas Jehová Diosqa serviqninkunamantam atiyta chaskin. ¿Imaynatataq atiyta qochwan tukuy ima Unanchaq Diosmanqa? (Isaias 40:25, 26.) Kikinman rikchakuqta unachawasqanchikraykum pay hina sumaq kayniyoqkuna kanchik, atiyniyoq otaq kallpayoqpas (Genesis 1:27). Tukuy ima qowasqanchikmanta Unanchaqninchikta agradecekuspaqqa kallpanchakusunchikmi payta hatunchananchikpaq hinaspa yupaychananchikpaqpas. Munasqallanchikpi kallpanchikta servichikunamantaqa Diosta yupaychanapaqmi servichikuna (Marcos 12:30).
Hinaptinqa, ¿imapaqtaq kawsanchik? Apocalipsis 4:11 nisqapa tukupayninpim niwanchik “munaynikiman hina unanchaptikim kachkan tukuy imakunaqa”, nispa. Hinaptinqa Dios munasqanraykum kawsanchik, manam kikillanchikmantachu. Chaymi kusikuytaqa mana tarichwanchu munasqallanchikpi afanakuspanchikqa. Sichum hawkayaypi hinaspa kusikuypi kawsakuyta munaspanchikqa yachananchikmi imatam Dios munan ñoqanchikmanta, hinaspa kawsananchiktaqmi munasqanman hina. Chayta ruraspallam yachasunchik imapaq unanchasqa kasqanchikta (Salmo 40:8).
[26 kaq paginapi reqsikusqanchikmanta]
NASA, ESA hinaspa A. Nota (STScI)