¿Lliw religionkunatachu Dios chaskin?
Runakunam ninku:
▪ “Lliw religiontam Diosqa chaskin.”
▪ “Ima religionpi kaspapas tukuy sonqowan Diosta serviymi allinqa”, nispa.
Jesusmi nirqa:
▪ “Kichki punkuntayá yaykuychikqa, hatun punkunta hinaspa hatun ñannintaqa richkanku [. . .] [“wañuymanmi”, NM], chaynintaqa achkallañam richkanku. Kichki punkunta hinaspa kichki ñannintaqa richkanku wiñay kawsaymanmi, aschallam chaynintaqa richkanku”, nispa (Mateo 7:13, 14). Jesusqa yacharqam llapallan religionkunata Dios mana chaskisqanta.
▪ “Juicio punchaw chayaramuptinqa achkallañam niwanqaku: ‘Señorlláy, Señorlláy, ñoqaykuqa qamraykum willakurqaniku, qamraykum demoniokunata qarqorqaniku, qamraykutaqmi achka milagrokunatapas rurarqaniku’ nispa. Hinaptinmi nisaq: ‘Manam reqsikichikchu. ¡Qayllaymanta asuychik mana allin ruraqkuna!’ nispa.” (Mateo 7:22, 23.) “Cristotam qatini” niqkunataqa manam llapallantachu Jesusqa chaskin.
ACHKA runakunam amañarunku religionninkupi costumbrenkuwan hinaspa Diosta imayna adorayninkuwanpas. Ichaqa, ¿imatam niwaq chay yachachikuykuna Bibliapa nisqanwan mana tupaptinqa? Jesusmi runakunapa costumbrenkunata qatikuq religiosokunata nirqa: ‘Diospa kamachikuynintam yanqachankichik costumbrekichikkunallata ruraspaykichik’, nispa. Hinaspam Diospa nisqanta nirqa: “Simillanwanmi yupaychawan kay runakunaqa, ñoqamanta karupim kachkan sonqonkuqa. Paykunaqa adorawankupas yanqapaqmi, yachachisqankupas runapa kamachisqallanmi”, nispa (Mateo 15:1-9; Isaias 29:13).
Chaynaqa manam iñisqallanchikchu allinqa kanan, rurasqanchikpas allinmi kanan. Bibliapa nisqanman hinaqa achka runakunam ninku; “‘Cheqaptam Diosta reqsiniku’ nispa, rurasqankuwanmi ichaqa qawachikuchkanku mana chayna kasqankuta” (Tito 1:16). Bibliaqa nintaqmi kay tiemponchikpi runakunaqa ‘Dios yupaychayta qepaman churaspanku kikinkupa munasqallankupi purinankuta. Yanqallam Diosta serviq tukunqaku, aswanqa sonqonkuwanqa manam creenkuchu’, nispa. Chaymantapas ninraqmi: “Chayna runakunawanqa amayá hukllawakuychu”, nispa (2 Timoteo 3:4, 5).
Chaynaqa, manam ima religionpi kaspapas tukuy sonqowan Diosta serviyllachu. ¿Imanasqa? Tukuy sonqowan qatikuspapas pantaypipaschá kachkachwan. Chaymi Diosta allinta reqsinanchik (Romanos 10:2, 3). Dios chaskiwananchikta munaspaqa Bibliapa cheqap yachachikuynintam reqsinanchik hinaspapas kasukunanchikmi (Mateo 7:21). Hinaptinqa, cheqap religionqa kallpanchanmi allintapuni Diosmanta yachanapaq hinaspa allinta kawsakunapaqpas. Allinta kawsakuyqa Diospa munasqanta sapa punchaw ruraymi (1 Juan 2:17).
Bibliapa nisqanman hina Diosmanta yachayta munaptikiqa kallpanchaykikum Jehová Diospa testigonkunawan gratislla Bibliata estudianaykipaq.
[10 kaq paginapi suti rikuylla kaq willakuy]
Cheqap religionqa kallpanchanmi allintapuni Diosmanta yachanapaq hinaspa allinta kawsakunapaqpas