Kikinmanta Jesuspa yachachisqankuna

“Jesusqa allintam yacharqa pim kasqanta, maymanta hamusqanta hinaspa imapaq kay Pachaman hamusqanmantawan ima pasananmantapas.” (HERBERT LOCKYER, QELLQAQ.)

JESUSPI chaynataq yachachisqankunapi iñinapaqqa, puntatam allintaraq reqsinanchik. Yachananchikmi pim kasqanta, maymanta hinaspa imapaq hamusqantapas. Mateo, Marcos, Lucas hinaspa Juan librokunapim kikin Jesuspa rimasqanman hina chay tapukuykunapa kutichiyninta tarinchik.

Ñam kawsarqaña manaraq kay pachaman hamuchkaspa. Jesusmi nirqa: “Manaraqpas Abraham kachkaptinqa ñam karqaniña”, nispa (Juan 8:58). Abrahanmanta iskay waranqa wata qepataña Jesus nacechkaspanqa, ¿imaynatamá puntataraq kawsanman karqa? Jesuspa nisqanman hinaqa, ‘hanaq pachamanta hamusqanraykum’ (Juan 6:38).

Diospa churin. Angelkuna Diospa churinkuna kaptinkupas, Jesusqa aswanraqmi. Jesuspunim nirqa ‘Diospa sapallan Churin’ kasqanta (Juan 3:18). ¿Imanasqa? Kikin Dios mana pipa yanapakuyninwan unanchasqanrayku. Tukuy imakunaqa Jesusnintakamañam unanchasqa karqa (Colosenses 1:16).

‘Diosmanta Hamuq Runa’. Kay rimaytam achka kutipi Jesusqa servichikurqa kikinmanta rimaspan (Mateo 8:20). Kaywanmi allinta qawachirqa ñoqanchik hina runapuni kasqanta, manam runaman tikrakusqa angelchu karqa. Diosqa chuya espiritunwanmi doncella Mariapa wiksanman Jesusta churaykurqa. Chaynapim hanaq pachapi kawsasqanmanta kay pachapi nacerqa mana huchayoq runaña (Mateo 1:18; Lucas 1:35; Juan 8:46).

Prometesqa Mesias. Huk kutipim Samaria llaqtayoq warmi nirqa: “Yachanim Cristo nisqanku Mesias hamunanta”, nispa. Jesusñataqmi nirqa: “Kay rimapayaqnikim Mesiasqa kani”, nispa (Juan 4:25, 26). Mesias hinaspa cristo niq rimaykunaqa “sapaqchasqa” otaq akllasqa ninanmi. Huk rimaypiqa Diosmi Jesusta akllarurqa munayninta cumplinanpaq.

Imapaq hamusqanmanta. Kikinmi nirqa: “Diospa munaychakusqanmanta allin noticiataqa wakin llaqtakunapipas willakunaymi, chaypaqmi ñoqataqa kachamuwarqa”, nispa (Lucas 4:43). Arí, allin ruraykunatapas rurarqamá, ichaqa Diospa Munaychakuyninmanta willakuytam puntapi churarqa. Chaymantam qatiqninkunapi yachasun.

Kunankama yachasqanchikkunaqa qawachinmi Jesusqa wakin runakuna hinalla mana kasqanta.a Chaymantapas yachasunmi hanaq pachapi kasqanrayku kay Pachapi yachachisqankuna pimantapas aswan allin kasqanta. Chaymi yachachisqankunaqa millonnintin runakunapa sonqonman chayarqa.

[Willakuy]