Diosman asuykuychik
Gobiernoykiqa wiñaypaqmi takyanqa
ACHKA kamachiq runakunam tiempopa risqanman hina kamachisqanta saqerqaku. Wakinkutaqa manamá kaqmanta akllarqakuchu, wakinñataqmi qarqosqa karqaku. Ichaqa, ¿imatam nichwan hanaq pachamanta kamachinanpaq Diospa akllasqan Rey Jesusmanta? ¿Imapas harkanmanchu kamachinanpaq? Kaymanta yachanapaq qawasun, ñawpa Israel llaqtata kamachiq rey Davidman Jehová Diospa ima nisqanta, chaytam tarinchik 2 Samuel libropa 7 capitulonpi.
Kay capitulopa qallariyninpim willawanchik, Diospa baulnin karpallapi kasqanrayku David hukmanyasqanmanta.a Chaymi munarqa sumaq templota Jehová Diospaq rurapuyta (2 versiculo). Ichaqa chay templota pay mana rurananmanta yacharuspanmi hukmanyarurqa. Jehová Diosmi willakuq Natanwan Davidman nirqa huk kaqnin churin chay templota rurananmanta (4-5, 12, 13 versiculokuna).
Jehová Diosqa kusikurqam Davidpa chayna ruray munasqanwan. Chaymi Payman sonqo kasqanrayku hinaspa promesanrayku Diosqa Davidwan contratota rurarqa; prometerqam Davidpa mirayninmanta wiñaypaq kamachiqta rikurichinanmanta. Chaytam Diosqa willakuq Natanwan Davidman kaynata willachirqa: “Castaykipas chaynataq gobiernoykipas wiñaypaqmi takyanqa. Castaykipa gobiernontapas wiñaypaqmi takyachisaq” nispa (16 versiculo). ¿Pitaq chay miraymanta wiñaypaq kamachikuyta chaskinman karqa? (Salmo 89:20, 29, 34-36.)
Nazaretmanta Jesusmi Davidpa miraynin karqa. Jesuspa nacesqanmanta willakuq angelmi nirqa: “Diospunim rey kananpaq churanqa ñawpaq abuelon Davidta hina. Israel naciontam wiñaypaq gobiernanqa, gobiernonqa manam tukunqachu”, nispa (Lucas 1:32, 33). Hinaptinqa Davidwan Diospa contrato rurasqanqa Jesucristopim cumplikun. Chayna kamachinanpaqqa manam runakunachu akllarqa, aswanmi Jehová Dios wiñaypaq kamachinanpaq prometesqanrayku. Yuyarinanchiktaqmi, Diospa promesankunaqa haykapipas cumplikunmi (Isaias 55:10, 11).
2 Samuel libropa 7 capitulonmantaqa iskay yachachikuykunatam yachachwan. Punta kaq; manam pipas Jesus kamachinantaqa harkanqachu. Kaymi segurawanchik Diospa munayninta kay pachapi chaynataq hanaq pachapipas Jesus rurananta (Mateo 6:9, 10).
Iskay kaq; yachachiwanchiktaqmi Jehová Dios imayna kasqanta. Payqa chanincharqam templonta rurananpaq Davidpa munasqanta. ¿Manachu kusikunchik serviy munasqanchikta Dios chaninchasqanmanta? Arí, wakinpiqa onqosqanchikrayku otaq yuyaqyasqanchikraykum mana atichwanchu munasqanchikman hina Dios serviyta. Ichaqa Diosqa chaninchanmi Payrayku lliw ruray munasqanchikta, ¡mayna kusikunapaqmi chayqa!
[Willakuy]
a Diospa baulninqa sagradom karqa, chaytaqa Jehová Diospa nisqanman hinam rurarqaku. Chayqa qawachirqam ñawpaq Israel llaqtawan Dios kasqanmanta (Exodo 25:22).