Diosman asuykuychik
Unanchawarqanchikmi sapakama akllakuqta
ACHKA tayta-mamakunapa sumaq ejemplonmi warmankuta yanapan sumaq kayniyoq kanankupaq hinaspa vidankupi allinta tanteanankupaqpas. Ichaqa manamá lliw tayta-mamakunachu sumaq ejemplo kanku. ¿Chayraykuchu warmankunapas chayna kananku? Manamá, Diosqa unanchawarqanchikmi imayna kawsanapaq sapakama akllakuqta. Kayta entiendenapaqmi yanapawanchik 2 Reyes 18:1-7 nisqanpi Ezequiasmanta willakusqan.
Ezequiasqa karqa ‘Juda nacionpa reynin Acaz’ runapa churinmi (1 versiculo). Diosta yupaychanankupaq kallpanchananmantaqa, kay mana allin reyqa Baal taytacha yupaychaytam rikurichirqa, hinaspam runakunatapas ofrendata hina kañarqa. Bibliaqa ninmi Ezequiaspa huk kaqnin wawqentapas ofrendata hina kañarusqanta. Templotapas wichqarachirqam, hinaspam “Jerusalen llaqtapa llapallan esquinankunapi rurachirqa altarkunata”, chay rurasqanwanmi Diosta piñachirqa (2 Cronicas 28:3, 24, 25). Hinaptinqa churin Ezequiaspaqqa mana allin ejemplom karqa. Chaynaqa, ¿churin Ezequiaspas taytan hinachu kanan karqa?
Manamá, chaytam qawachirqa rey kaspan. Taytan Acazmantaqa, Ezequiasqa “Diospa qayllanpim allinta rurarqa” (3 versiculo). Diostam kasukuq, chaymi Biblia nin: “Juda nacionpi reykunamantaqa manam pipas Ezequias hinaqa karqachu”, nispa (5 versiculo). Punta wata kamachisqanpim, kallpanchakurqa taytacha-mamachakunata chinkachinanpaq. Jerusalenpi templotapas kichachirqam, hinaspam cheqap yupaychayta kaqmanta qallarichirqa (4 versiculo; 2 Cronicas 29:1-3, 27-31). “Diosman confiakuykuspanmi paymanta mana rakikurqachu [. . .]. Payta Tayta Dios yanapasqanraykum tukuy rurasqan allin lloqsiq” (6, 7 versiculokuna).
¿Imanasqataq Ezequiasqa mana taytan hinachu karqa? Yaqapaschá maman Abias paypaq sumaq ejemplo karqa. Otaq yaqachá Isaiaspa willakusqankuna yanaparqa, payqa Ezequias manaraq nacechkaptinmi willakuyta qallaykurqa.a Arí, Bibliaqa manamá ninchu Ezequiasta pi yanapasqanmantaqa. Ichaqa, payqa manam taytan hina mana allin ruraqchu karqa.
Ezequiasmanta yachayqa kallpanchanmanmi warmallaraq kasqankupi sasachakuqkunata otaq mana allin tayta-mamayoq kaqkunata. Manamá ñawpaqpi kaqkunataqa cambiayta atichwanchu, nitaqmi mana allin pasawasqanchiktapas chinkachiyta atichwanchu. Ichaqa atichwanmi kunan allinta tanteakuspa vidanchikpi allin kawsakuytaqa. Hinaptinqa, ñoqanchikpas Ezequias hinam Jehová Diosta kuyaspa serviyta atichwan. Chaynata ruraspaqa, kusisqam kasun hinaspa hamuq tiempopipas Diospa prometewasqanchik mosoq pachapim wiñaypaq kawsasun (2 Pedro 3:13; Apocalipsis 21:3, 4). Sapakama akllakuqta Dios unanchawasqanchikmanta yachayqa, ¿manachu payta astawan reqsinapaq kallpanchawanchik?
[Willakuy]
a Isaiasqa willakuytam qallaykurqa 778 watamanta 732 wata pasaykama, Ezequiasñataqmi gobiernayta qallaykurqa 745 watapi, 25 watanpi kachkaspan.